Жазоирнинг «ЖС Кабилия» футбол клуби камерунлик ҳужумчиси Альберт Эбоссе трибунадан отилган тош келиб тегиши натижасида вафот этди. Бу ҳақда «РИА Новости» хабар бермоқда.
Воқеа «ЖС Кабилия»нинг ўз майдонида «УСМ Алжир» билан учрашувида содир бўлди. Баҳс 2:1 ҳисобида меҳмонлар фойдасига ҳал бўлди. Мезбонларнинг ягона голини Эбоссе киритди.
Ўйин тугагач, мухлислар трибуналардан турли буюмларни майдонни тарк этаётган футболчиларга қаратиб ота бошлади. Эбоссенинг бошига тош келиб тегди. Футболчи шифохонага етказилди, у ерда шифокорлар унинг ўлимини қайд этишди.
Фожиа ҳақидаги янгиликдан сўнг Facebook ижтимоий тармоғида Эбоссе оиласига ҳамдардлик билдириш ва унинг хотирасини эслаш учун саҳифа очилди.
Жазоир ички ишлар вазирлиги ҳодиса юзасидан тергов ишларини бошлаб юборди.
24 ёшли Эбоссе 2013 йилдан «ЖС Кабилия» таркибида фаолият кўрсата бошлаган. Ўтган мавсумда у 17 та гол билан, Жазоир чемпионатининг энг кўп тўп урган футболчисига айланган эди.
Изоҳ (0)