Opera ва Microsoft компаниялари Opera Mini Nokia телефонларида асосий интернет браузери бўлиши ҳақида шартнома имзолашди. Бу ҳақда Reuters ахборот агентлиги маълумотига асосланиб «Пароль» нашри хабар берди.
Шартномага кўра, эндиликда ишлаб чиқариладиган Series 30+, Series 40 ва Asha линейкасидаги телефонларга Opera Mini асосий интернет браузери сифатида ўрнатилади. Ушбу телефонлардан фойдаланаётганлар учун эса Xpress браузеридан Opera Mini’га ўтиш тавсия қилинади.
«Бу биз учун катта шартнома, биз буни 10 йиллардан бери орзу қилар эдик», — дейди Opera компанияси раҳбари Ларс Боилсесен.
Ҳозирда 250 миллиондан ортиқ қурилмаларда Opera Mini браузери ўрнатилган ва уларнинг 100 миллионтаси Android операцион тизимида ишлайди. Windows Phone операцион тизимида ишлайдиган Nokia қурилмалари учун ҳам Opera Mini асосий интернет браузери бўлиши ҳақида шартнома имзоланадими, йўқми номаълум. Ҳозирда Windows Phone қурилмалари учун Internet Explorer’нинг мобил версияси асосий интернет браузери ҳисобланади.
Изоҳ (0)