Дунёдаги энг катта дисплейли планшет ишлаб чиқарилди

Fuhu компанияси Android операцион тизимида ишлайдиган The Big Tab номли дунёдаги энг катта планшетни ишлаб чиқарди. Бу ҳақда TechCrunch маълумотига асосланиб «Пароль» нашри хабар берди.

The Big Tab планшетининг икки хил тури мавжуд бўлиб, улардан бирининг дисплейи 20 дюйм (50,8 сантиметр), иккинчисининг дисплейи эса 24 дюйм (60,96 сантиметр). Планшетлар тўрт ядроли NVIDIA Tegra 4 процессори ва 16 Гб ички хотирага эга. Улар Android 4.4.4 операцион тизимида ишлайди.

Планшет болалар ва ота-оналар учун мўлжалланган бўлиб. Унда болалар учун ўқиш, ёзиш ва математикадан 17 000 та дарс ҳамда 300 000 та саволлар мавжуд. Шунингдек, планшетда Disney, Cartoon Network ва Cookie Jar Entirnainment каби компанияларнинг видеофильмлари жамланган.

Куздан бошлаб 20 дюймли планшет 449 доллар, 24 дюймлиси эса 549 доллар эвазига сотувга чиқарилади. Ушбу планшетни Ўзбекистонда сотилаётган энг қиммат планшетлар билан таққослашингиз мумкин.