Дани Алвес Ice Bucket Challenge доирасида муздек сувга чўмилди ва Мессига чақириқ йўллади

«Барселона» клуби ва Бразилия терма жамоаси ҳимоячиси Даниэл Алвес Ice Bucket Challenge акциясига қўшилди, деб хабар бермоқда Uff.uz.

Ice Bucket Challenge акциясига кўра, машҳур инсонлар ўз устиларидан муздек сув қуйиб юбориши ва буни тасвирга олиб, уч нафар дўстига бу ишни такрорлашни ёки хайрия жамғармасига пул ўтказишни таклиф қилиши лозим. Хайриядан тушадиган маблағ амиотрофик склероз — Лу Гериг касаллигига чалинганларга сарфланади. Бу касаллик одамнинг бош мия системасига таъсир қилиб, кейинчалик фалажликка олиб келиши мумкин.

Дани Алвес ҳам ушбу акция доирасида муздек сувга чўмилди ва уч нафар дўсти — футболчи Лионель Месси, модел Адриана Лима ва телебошловчи Фаустаоларни ҳам шу ишни такрорлашга ёки хайрия қилишга чақирди.

Эслатиб ўтамиз, кенг тарқалаётган акция доирасида Роналдунинг устидан сув қуйишган эди.

Аввалроқ Facebook асосчиси Марк Цукерберг ҳам ўз устидан сув қуйиб, Microsoft асосчиси Билл Гейцга чақириқ йўллаган, кўп ўтмай, Билл Гейц ҳам тадбир иштирокчисига айланган эди.

Бундан ташқари, Apple компаниясининг раҳбари Тим Кук шу ишни амалга оширгани ҳақида хабар берилган.