Согдиана саҳнага қайтиб, Ўзбекистонда ижод қилиш баридан муҳим эканлигини айтиб ўтди. Бу ҳақда Darakchi.uz хабар бермоқда.
Согдиана катта ижодий танаффус қилишининг боиси фарзандлари тарбияси бўлганини айтиб, куз ойларида янги ижод намуналарини мухлисларга ҳавола этишини маълум қилди.
Хонанда ҳозир хит-парадларда кетма-кет биринчи ўринни эгаллаб келаётган Тимур Ёлқин ва Александр Ковалёв қаламига мансуб янги «Молния» номли таронасига Ирина Миронова режиссёрлиги остида клип суратга олинганини қайд этди. Клип трек йўналишида бўлиб, либослар ва пардозга алоҳида эътибор қаратилган. «Ҳамкорлигимиз натижаси кутганимдан ҳам аъло даражада бўлди», — дейди қўшиқчи.
Согдиана мухлисларини куттирмай, тез орада яккахон концерт дастури ва янги альбомини тақдим этишини маълум қилди.
Айни дамда мазкур альбом устида иш олиб борилаётган бўлиб, ундан «Только не молчи», «Молния», Райҳон билан куйланган дуэт кабилар жой олиши кутилмоқда. «На расстоянии руки» ва «Любить тебя» номли янги қўшиқлар ҳам мухлислар этиборига ҳавола этилади. Альбомдан жой олган тароналарда нафақат қарши жинс вакиллари ўртасидаги севги, балки ота-она, фарзандга бўлган муҳаббат ҳақида ҳам куйланади.
Ижодини Ўзбекистонда давом эттиришга аҳд қилган хонанда «Ижод, санъат чегара билмайди, у одамларни бир-бирига яқинлаштиради. Ҳар бир мухлис мен учун қадрли. Лекин Ватаним — баридан муҳим!» — деб таъкидлади.
Фарзандлари ҳақида берилган саволга Согдиана иккала ўғлининг инглиз мактабида ўқиётганини айтди. У «Катта ўғлим Аржун математик бўлса керак, феноменал хотираси кучли. Ҳамма нарса ёдида туради. Микаил эса, рақс тушишни, спортни яхши кўради. Боғчада қизларни шу қадар ҳурмат қиладики, қизчалар ҳам уни жуда яхши кўришади», — деб сўзини якунлади.
Изоҳ (0)