АҚШ парламенти Исроилнинг «Темир гумбаз» ракетага қарши мудофаа мажмуасини қўшимча молиялаштириш тўғрисидаги қонун лойиҳасини маъқуллади. Бу ҳақда «Кун» нашри хабар берди.
Исроилга 225 миллион доллар ажратиш ҳақидаги қонун лойиҳасини 1 август, жума куни дастлаб Сенат, сўнг АҚШ Конгрессининг Вакиллари палатаси маъқулади, дея хабар бермоқда Reuters ахборот агентлиги.
Тез орада ушбу ҳужжатни АҚШ президенти Барак Обама имзолаши кутилмоқда.
Ўтган ҳафта АҚШ Мудофаа вазирлиги – Пентагон Исроилга кўрсатиладиган ҳарбий ёрдам тўпламига киритиш учун Конгрессдан қўшимча 225 миллион доллар сўраган эди.
АҚШ мудофаа вазири Чак Хейгелнинг сўзларига кўра, ушбу маблағ Ғазо секторидан ўққа тутилаётган Исроил ҳудудларини муносиб ҳимоя қилиш учун керак бўладиган «Темир гумбаз» ракета ҳужумига қарши мудофаа мажмуаларини ишлаб чиқариш учун зарур.
Исроилга кўрсатилаётган АҚШ ҳарбий ёрдами ҳажмининг ошишига Исроил ҳамда ҲАМАС ўртасидаги қарама-қаршиликнинг кескинлашиб кетгани сабаб бўлди.
Исроил 8 июлдан бери ҲАМАС гуруҳи назорати остидаги Ғазо секторидан амалга ошириладиган ракета зарбаларига барҳам бериш ҳамда у ердаги Мисрга олиб чиқадиган ерости туннеларини йўқ қилиш мақсадида «Мудофаа чизиғи» («Бузилмас қоя») операциясини ўтказмоқда.
«Темир гумбаз» дастурини қўшимча молиялаштиришдан ташқари, АҚШ Исроилга ракетага қарши «Найза» ва «Довуд сопқони» мажмуаларини ишлаб чиқиш ва ишлаб чиқариш учун ҳам маблағ ажратишга қарор қилган.
Хусусан, қайд этилган биринчи дастур бўйича Исроилга 130 миллион доллар, иккинчи дастур бўйича эса 137,9 миллион доллар миқдорида маблағ ажратилиши кўзда тутилган.
АҚШ Сенати маълумотларига кўра, ҳозирга қадар АҚШ Исроилнинг ракетага қарши мудофаа дастурлари учун 600 миллион доллардан ортиқ маблағ ажратган.
АҚШ «Темир гумбаз» дастурини амалга ошириш учун Исроилга шу кунгача ярим миллиард доллардан ортиқ маблағ тақдим этган. Мажмуа батареяси бошқарув маркази, радар ва учта отиш қурилмасидан иборат.
70 километргача масофага мўлжалланган ракеталарни тутиб қолишга мўлжалланган ушбу мажмуа рақиб қуролининг тахминий тушиш жойини аниқлаш ва агар рақиб ракетаси аҳоли яшамайдиган жойга тушиши маълум бўлса, уни йўқ қилиш ҳақидаги буйруқни бекор қилиш қобилиятига эга.
Изоҳ (0)