AQSh parlamenti Isroilning “Temir gumbaz” raketaga qarshi mudofaa majmuasini qo‘shimcha moliyalashtirish to‘g‘risidagi qonun loyihasini ma’qulladi. Bu haqda “Kun” nashri xabar berdi.
Isroilga 225 million dollar ajratish haqidagi qonun loyihasini 1-avgust, juma kuni dastlab Senat, so‘ng AQSh Kongressining Vakillari palatasi ma’quladi, deya xabar bermoqda Reuters axborot agentligi.
Tez orada ushbu hujjatni AQSh prezidenti Barak Obama imzolashi kutilmoqda.
O‘tgan hafta AQSh Mudofaa vazirligi – Pentagon Isroilga ko‘rsatiladigan harbiy yordam to‘plamiga kiritish uchun Kongressdan qo‘shimcha 225 million dollar so‘ragan edi.
AQSh mudofaa vaziri Chak Xeygelning so‘zlariga ko‘ra, ushbu mablag‘ G‘azo sektoridan o‘qqa tutilayotgan Isroil hududlarini munosib himoya qilish uchun kerak bo‘ladigan “Temir gumbaz” raketa hujumiga qarshi mudofaa majmualarini ishlab chiqarish uchun zarur.
Isroilga ko‘rsatilayotgan AQSh harbiy yordami hajmining oshishiga Isroil hamda HAMAS o‘rtasidagi qarama-qarshilikning keskinlashib ketgani sabab bo‘ldi.
Isroil 8 iyuldan beri HAMAS guruhi nazorati ostidagi G‘azo sektoridan amalga oshiriladigan raketa zarbalariga barham berish hamda u yerdagi Misrga olib chiqadigan yerosti tunnelarini yo‘q qilish maqsadida “Mudofaa chizig‘i” (“Buzilmas qoya”) operatsiyasini o‘tkazmoqda.
“Temir gumbaz” dasturini qo‘shimcha moliyalashtirishdan tashqari, AQSh Isroilga raketaga qarshi “Nayza” va “Dovud sopqoni” majmualarini ishlab chiqish va ishlab chiqarish uchun ham mablag‘ ajratishga qaror qilgan.
Xususan, qayd etilgan birinchi dastur bo‘yicha Isroilga 130 million dollar, ikkinchi dastur bo‘yicha esa 137,9 million dollar miqdorida mablag‘ ajratilishi ko‘zda tutilgan.
AQSh Senati ma’lumotlariga ko‘ra, hozirga qadar AQSh Isroilning raketaga qarshi mudofaa dasturlari uchun 600 million dollardan ortiq mablag‘ ajratgan.
AQSh “Temir gumbaz” dasturini amalga oshirish uchun Isroilga shu kungacha yarim milliard dollardan ortiq mablag‘ taqdim etgan. Majmua batareyasi boshqaruv markazi, radar va uchta otish qurilmasidan iborat.
70 kilometrgacha masofaga mo‘ljallangan raketalarni tutib qolishga mo‘ljallangan ushbu majmua raqib qurolining taxminiy tushish joyini aniqlash va agar raqib raketasi aholi yashamaydigan joyga tushishi ma’lum bo‘lsa, uni yo‘q qilish haqidagi buyruqni bekor qilish qobiliyatiga ega.
Izoh (0)