Араб давлатлари лигаси (АДЛ) ҲАМАС ташкилотини Мисрнинг Исроил билан отишмани тўхтатиш ҳақидаги таклифига кўндиришга уринмоқда. Бу ҳақда ИТАР-ТАСС хабар берди.
Қоҳирада лиганинг ижро этувчи раҳбари Набил ал-Арабий БМТ Бош котиби Пан Ги Мун билан бўлган учрашувдан сўнг «Мисрнинг таклифи заруриятга айланмоқда; унинг ҲАМАС томонидан қабул қилинишига умид қиляпмиз», — деб таъкидлади.
Айни вақтда ҲАМАС ўзи қўйган шартларнинг бажарилиши, хусусан, Исроил томонидан тажовуз ва ўрнатилган қамалнинг тўхтатилишини талаб қилмоқда.
Куни кеча Қоҳирада Мисрнинг ҲАМАС ташкилоти қўйган айрим талабларни бажаришга ва ўз режасига ўзгартириш киритишга тайёр эканлиги ҳақида хабар тарқалди. Ҳарбий ҳаракатларни тўхтатишни кўзда тутадиган мазкур ташаббус фақатгина Исроил томонидан маъқулланди. ҲАМАС эса уни рад этди ва бу, ўз навбатида, сектор ҳудудидаги қуруқлик операцияси бошланишидан дарак берди.
Бироқ кейинроқ Миср Ташқи ишлар вазири самеҳ Шукри тарқалган маълумотни рад этиб, режага ҳеч қандай ўзгартириш киритилмаслигини айтди. У таклифлар барча масалаларни икки томоннинг манфаатидан келиб чиқиб ҳал қилишни кўзда тутаётганини айтиб, «Бу ташаббуснинг мақсади Фаластин халқини ҳаддан зиёд кўп куч ишлатиш ҳисобига содир бўлаётган қирғин ва хатардан, шунингдек, можаронинг янада кучайиб кетишидан ҳимоя қилишдир», — деб таъкидлади.
Маълумот учун, сўнгги икки ҳафта давомида анклавда давом этаётган ҳарбий ҳаракатлар натижасида 540 дан зиёд фаластинлик ҳалок бўлди.
Изоҳ (0)