Украина шарқида қулаган Malaysia Airlines’нинг «Боинг-777» самолёти россияпараст айирмачилар томонидан назорат қилинаётган ҳудуддан уриб туширилган. Бу ҳақда АҚШ президенти Барак Обама ушбу авиаҳалокатга бағишланган махсус баёнотида маълум қилди, деб ёзади «Кун».
Обаманинг сўзларига кўра, ҳозир бутун дунёнинг диққат-эътибори Украина шарқига қаратилган, у ердаги фожеа Европа ва бутун жаҳон учун «уйғониш қўнғироғи»дек таъсир қилган.
Обаманинг таъкидлашича, Украина шарқида қулаган «Боинг» бортида камида бир нафар АҚШ фуқароси бўлган. Аввалроқ, ҳалокатга учраган лайнер бортида 23 нафар АҚШ фуқароси бўлгани ҳақида хабарлар берилган эди.
Обаманинг қайд этишича, «Боинг»нинг қулашига сабаб бўлган «ер – ҳаво» типидаги ракета ҳозирги вақтда Украина шарқидаги россияпараст айирмачилар назорати остида бўлган ҳудуддан учирилган, деб ёзади CNN. «Бу ракетани учирганларнинг мақсади нима бўлгани ҳақида гапиришга ҳали эрта», — деди Обама.
Обаманинг сўзларига кўра, Россия Украина шарқида ҳаракат қилаётган россияпараст айирмачиларга мунтазам равишда ёрдам бермоқда, уларга ҳатто оғир ва ҳаводаги нишонларга зарба беришга имконини берадиган қуролларни ҳам тақдим этган.
«Россия, Украина ва россияпараст айирмачилар зудлик билан ўт очишни тўхтатишлари керак. Агар Путин Украина шарқидаги айирмачиларни қурол билан қўллаб-қувватлашни тўхтатиш тўғрисида қарор қабул қилса, ўз-ўзидан тўхтайди. Украинадаги ҳозирги зўравонлик ҳолатига энг катта таъсирни айнан Путин кўрсата олади», – дея Обаманинг сўзларидан иқтибос келтирмоқда Reuters.
Эслатиб ўтамиз, Malaysia Airlines’нинг Boeing 777 самолёти 17 июль, пайшанба куни Украина ҳудудида ҳалокатга учраган эди. Самолёт бортида 283 нафар йўловчи ва экипажнинг 15 нафар аъзоси бўлган. Уларнинг барчаси ҳалок бўлган.
Изоҳ (0)