Ukraina sharqida qulagan Malaysia Airlines’ning “Boing-777” samolyoti rossiyaparast ayirmachilar tomonidan nazorat qilinayotgan hududdan urib tushirilgan. Bu haqda AQSh prezidenti Barak Obama ushbu aviahalokatga bag‘ishlangan maxsus bayonotida ma’lum qildi, deb yozadi “Kun”.

Obamaning so‘zlariga ko‘ra, hozir butun dunyoning diqqat-e’tibori Ukraina sharqiga qaratilgan, u yerdagi fojea Yevropa va butun jahon uchun “uyg‘onish qo‘ng‘irog‘i”dek ta’sir qilgan.

Obamaning ta’kidlashicha, Ukraina sharqida qulagan “Boing” bortida kamida bir nafar AQSh fuqarosi bo‘lgan. Avvalroq, halokatga uchragan layner bortida 23 nafar AQSh fuqarosi bo‘lgani haqida xabarlar berilgan edi.

Obamaning qayd etishicha, “Boing”ning qulashiga sabab bo‘lgan “yer – havo” tipidagi raketa hozirgi vaqtda Ukraina sharqidagi rossiyaparast ayirmachilar nazorati ostida bo‘lgan hududdan uchirilgan, deb yozadi CNN. “Bu raketani uchirganlarning maqsadi nima bo‘lgani haqida gapirishga hali erta”, — dedi Obama.

Obamaning so‘zlariga ko‘ra, Rossiya Ukraina sharqida harakat qilayotgan rossiyaparast ayirmachilarga muntazam ravishda yordam bermoqda, ularga hatto og‘ir va havodagi nishonlarga zarba berishga imkonini beradigan qurollarni ham taqdim etgan.

“Rossiya, Ukraina va rossiyaparast ayirmachilar zudlik bilan o‘t ochishni to‘xtatishlari kerak. Agar Putin Ukraina sharqidagi ayirmachilarni qurol bilan qo‘llab-quvvatlashni to‘xtatish to‘g‘risida qaror qabul qilsa, o‘z-o‘zidan to‘xtaydi. Ukrainadagi hozirgi zo‘ravonlik holatiga eng katta ta’sirni aynan Putin ko‘rsata oladi”, – deya Obamaning so‘zlaridan iqtibos keltirmoqda Reuters.

Eslatib o‘tamiz, Malaysia Airlines’ning Boeing 777 samolyoti 17 iyul, payshanba kuni Ukraina hududida halokatga uchragan edi. Samolyot bortida 283 nafar yo‘lovchi va ekipajning 15 nafar a’zosi bo‘lgan. Ularning barchasi halok bo‘lgan.