Бугун, 15 июль куни Тошкент шаҳридаги Алоқа тарихи музейида матбуот анжумани ўтказилиб, унда Миллий Uz домени интернет-фестивалининг бошлангани ҳақида эълон қилинди.
Матбуот анжуманида фестивал қай тарзда олиб борилиши ҳақида маълумот берилди. Танловда фестивал ўтказилиши мобайнида амал қилган ва Uz доменида рўйхатдан ўтган сайтлар иштирок этиши таъкидланди.
Иштирок этишни хоҳловчилар www.if.uz сайтида рўйхатдан ўтиш орқали ариза тақдим этиши мумкин. Аризалар 2014 йил 15 июлдан 1 сентябрга қадар қабул қилинади.
Фестивал 15 июлдан 22 сентябргача давом этади. Бу йилги танлов дастури 10 та мавзули ва 2 та махсус номинацияни ўз ичига олади. Белгиланган муддатда интернет-фестивалнинг иштирокчилари орасида ҳар бир мавзули номинация бўйича энг кўп хост тўплаган 10 та сайт ғолиб бўлади. Ҳар бир номинация учун уч нафар иштирокчига ўрин берилиб, махсус диплом ва совринлар билан тақдирланади. Шунингдек, фестивалнинг беш нафар совриндорига фахрий лауреат Дипломи берилади.
Танловда иштирок этаётган сайтларни интернет-технологиялар, санъат, маданият, давлат бошқаруви ва бошқа соҳаларнинг етакчи мутахассисларидан иборат ҳакамлар ҳайъати баҳолайди. Якуний натижалар InfoCOM-2014 Ахборот технологиялар ҳафталигининг биринчи куни — 22 сентябрда Тошкент шаҳридаги Ёшлар ижод саройида эълон қилинади.
Анжуманда, шунингдек, фестивал доирасида Ўзбекистонда ишлаб чиқилган мобил дастурлар танлови ҳам ўтказилиши режалаштирилгани қайд этилди.
Маълумот учун, интернет-фестивал Ўзбекистонда 2001 йилдан буён ўтказиб келинмоқда. Унинг асосий мақсад ва вазифалари аҳоли ўртасида интернет тармоғини оммалаштириш, унда миллий контентни ривожлантиришга ёрдам кўрсатиш ва интернет тармоғида ўзбек тили қўлланилиши доирасини кенгайтиришдан иборат.
Изоҳ (0)