Зимбабве президенти Роберт Мугабе қора танли деҳқонларни қишлоқ хўжалик ерларини собиқ хўжайинлари — оқ танли фермерларга бермасликка чақирди. Бу ҳақда ИТАР-ТАСС хабар берди.
Президентнинг айтишича, Зимбабведа оқ фуқароларга компаниялар ва шаҳар мол-мулкларига эгалик қилишга рухсат берилган, бироқ ер туб аҳолига тегишли бўлиши керак.
2000 йилдан бошлаб Зимбабве ҳукумати мустамлакачилик қолдиқларини йўқ қилиб ташлаш мақсадида оқ танли фермерлар мол-мулкларини қора танли аҳолига ўтказиш ҳақида қонун қабул қилган эди. Натижада 6 минг оқ танлиларнинг ерлари 245 минг зимбабвеликлар ихтиёрига ўтди. Бироқ янги хўжайинлар етарлича тажриба ва ускуналарга эга бўлмагани туфайли мамлакатда озиқ-овқат танқислиги юзага келди.
Натижада Зимбабве йирик озиқ-овқат экспортчисидан шундай импортчига айланди. Ҳозирда озиқ-овқат маҳсулотларининг катта қисми АҚШ ва Евроиттифоқ давлатларидан гуманитар ёрдам доирасида келтирилади.
Изоҳ (0)