Бошпанасиз ню-ёркликларнинг хитойлик миллиардер Чен Гуанбяо уюштирган тушликдан кўнгиллари тўлмади. Шаҳардаги Марказий боғда уюштирилган зиёфатда ваъда қилинган 300 доллар пул берилмади. Бу ҳақда «РИА Новости» хабар берди.
Тунец балиғи ва мол гўштидан иборат тушлик Марказий боғ ҳудудидаги ресторанлардан бирида бўлиб ўтди. У ташкилотчиларга тахминан 40 минг долларга тушди. Хайрия ланчига 200 дан ошиқ бошпанасизлар ташриф буюрди.
Уларни Чен Гуанбяонинг ўзи машҳур хитойча қўшиқ билан кутиб олди ва фокуслар кўрсатди. Бироқ аввал ваъда қилинган нақд пул тарқатилмади.
Гап шундаки, Нью-Йоркдаги уйсизларга бошпана берувчи ташкилот миллиардерни уларнинг кўплаб мижозлари наркотик тобеликда экани ҳақида огоҳлантирган ва берилган нақд пулни наркотиклар сотиб олишга сарфлашлари мумкинлигини айтган.
Энди Чен Нью-Йоркдаги ночорларга кўмак берувчи ташкилотга 90 минг доллар топширмоқчи, у қашшоқларни ўқитиш ва қайта тайёрлаш дастурини амалга оширишга сарфланади.
Чен Гуанбяо ўз бойлигига қурилиш чиқиндиларини қайта ишлаш орқали эришган бўлиб, у ўзининг ғалати хатти-ҳаракатлари билан машҳурдир. 2008 йили у Сичуан кўчаларида зилзиладан жабр кўрган кишиларга пул улашган.
Бир неча йил аввал бизнесмен тортишувларга сабаб бўлган Дяоюйдао оролларининг Хитойга тегишли эканлигини New York Times газетасида «тантанали эълон қилган». Шу билан бирга, бизнесмен Американинг энг машҳур газеталаридан бири бўлган New York Times газетасини сотиб олишга ҳам қарши эмаслигини айтиб ўтган.
Изоҳ (0)