Украина президенти Пётр Порошенко мамлакат шарқида отишмаларни тўхтатиш режимини муддатидан аввал тугатиши мумкин. Бу ҳақда у ҳарбийлар билан учрашувда айтиб ўтди, дея хабар берди Euronews.
Президент матбуот хизмати тарқатган маълумотга кўра, Славянск остоналарида Украина ҳарбий самолёти айирмачилар томонидан уриб туширилганидан сўнг Порошенко бундай қарорга келган бўлиши мумкин. Ҳалокат натижасида олти нафар ҳарбий ва уч нафар экипаж аъзоси қурбон бўлди.
Киев президентнинг тинчлик режаси эълон қилинганидан буён ҳарбийларга қарата 35 марта ўт очилганини таъкидлади.
Вертолётнинг уриб туширилгани ҳақидаги маълумотни айирмачилар тасдиқламади, аммо улар ҳам Украина ҳарбийларининг вақтинчалик тузилган сулҳга риоя қилмаганини айтди.
«Донецк халқ республикаси» вакилларининг таъкидлашича, Киев ҳукумати «келишувдан бўйин товлаб», ўт очишни тўхтатиш ҳақидаги режим эълон қилинганидан кейин ҳам Славянск остоналаридаги Семёновка қишлоғини ўққа тутган, натижада беш киши ҳалок бўлган.
Исёнчилар Донецк аэропортидан шаҳарга қараб оғир бронетехника колоннаси келгани, уларга қарши жанговар хатти-ҳаракат бошлашга мажбур бўлиб қолганларини ҳам айтди.
Украина шарқида тинчлик режасини амалга ошириш бўйича консультациялар 23 июнь куни Донецкда бўлиб ўтди. 20 июнь куни президент Порошенконинг украин армияси томонидан ўт очишнинг тўхтатилиши ҳақидаги буйруғи кучга кирган эди. Ҳужжатда сулҳ 27 июнгача давом этиши қайд қилинган. Бироқ Украина ҳарбийларига ҳужум уюштирилган тақдирда, улар жавоб ўтини очишади.
Исёнчилар ҳам 27 июнга қадар отишмаларни тўхтатиб, жанговар фаолият олиб бормаслик мажбуриятини олишган.
Изоҳ (0)