2014 йилнинг 3 июнь куни Алишер Навоий номидаги кино саройида Европа Иттифоқининг Ўзбекистондаги делегацияси «Ўзбеккино» миллий агентлиги кўмагида ташкил этган Европа киноси фестивалининг очилиш маросими бўлиб ўтди. Бу ҳақда агентлик сайти хабар берди.
Европа киноси кунлари таниқли испан кинорежиссёри Пабло Берхернинг «Қордек оппоқ» фильми билан очилди.
Европа Иттифоқининг Ўзбекистондаги ваколатхонаси раҳбари Юрий Штеркнинг қайд этишича, Ўзбекистонда Европа киноси фестивали иккинчи марта ўтказилмоқда ва унда иштирок этаётиган мамлакатлар сони 11 тагача кенгайди. Ушбу фестивал ҳар йили 9 май куни нишонланадиган Европа куни доирасида ташкил этилмоқда.
Европа Иттифоқининг Ўзбекистондаги ваколатхонаси шу муносабат билан бир қанча тадбирлар, жумладан, Европа парламенти фаолиятига бағишланган фотокўргазма ва очиқ эшиклар кунини ўтказди.
Европа киноси фестивали Тошкентдан ташқари, 4—8 июнь кунлари Самарқанд ва Бухоро шаҳарларида ҳам бўлиб ўтади ва уч шаҳарда жами 13 та Европа бадиий ва анимацион фильми намойиш этилади.
Изоҳ (0)