Россиялик таниқли продюсер Максим Фадеев «Голос» шоуси юлдузи Наргиз Зокировани 6 июнь куни Москвада бўлиб ўтадиган «Муз-ТВ» телеканали мукофотларини топшириш маросимига тайёрламоқда. Бу ҳақда Vokrug.tv хабар берди.
«Продюсерлик марказимизга Наргизнинг келиб қўшилганидан жуда хурсандман, — деб ёзади Фадеев ўзининг Twitter’ида. — Наргиздек ижодкор билан бирга ишлашдан бахтиёрман. Хуш келибсан, Наргиз. Сенга панд бериб қўймайман».
Шунингдек, продюсер Наргиз учун «чин қалбдан» қўшиқ ёзганини, у «Муз-ТВ» маросимигача тайёр бўлиб қолишини қўшимча қилган.
Эслатиб ўтамиз, «Голос» телешоусининг иккинчи мавсумида юртдошимиз Наргиз Зокирова иштирок этди ва иккинчи ўринни эгаллади. 1984 йил режиссёр Али Ҳамроевнинг «Водиллик келин» фильмида янграган «Сен кетарсан» номли қўшиқ орқали танилган Наргиз Ўзбекистон Халқ артисти Фарруҳ Зокировнинг жиянидир.
Хонанда 1971 йил Тошкентда санъаткорлар оиласида туғилган. У таниқли опера қўшиқчиси, театр ва кино актёри, Ўзбекистон халқ артисти Карим Зокировнинг набираси. Наргиз 14 ёшида Юрмаладаги қўшиқлар танловида қатнашган. 90-йилларда ўзбек эстрадасида ижод қила бошлаган. 1995 йилда АҚШга кўчиб кетган ва орадан 20 йил ўтиб, 42 ёшида Россия саҳнасида кўриниш берди.
Наргиз Зокировага телетанлов саҳнасига чиққан илк дақиқалардан бошлаб кўпчилик қизиқиш билдирди. Бунга сабаб хонанданинг ташқи кўриниши, ноодатий имиджи, дейиш мумкин. У ноанъанавий соч турмаги, бош ва қўлларида татуировкалар, турли тақинчоқлар билан мутлақо «ўзбекча» бўлмаган кўринишда саҳнага чиқди.
Изоҳ (0)