Apple iPhone ва iPad учун мўлжалланган янги iOS 8 операцион тизимини тақдим этди. Корпорация раҳбари Тим Кук WWDC 2014 Бутунжаҳон ишлаб чиқувчилар анжуманида унинг имкониятлари ҳақида гапириб берди. Бу ҳақда «ИТАР-ТАСС» хабар берди.
Интерфейс ўзгармасдан iOS 7 даги каби қолди. ОТда билдиришномалар тизими янгиланди ва янада интерактив хусусият касб этди: энди фойдаланувчи дастурлардан чиқмасдан билдиришномаларга жавоб бериши мумкин бўлди.
Spotlight дастури (Apple’нинг интеграциялашган қидирув воситаси) дастурларда ҳам, iTunes’даги қўшиқларда ҳам излайдиган бўлди.
QuickType клавиатураси янгиланди: энди у тез киритиш учун сўзларни таклиф қилади.
Компания ўз мессенжерини ҳам янгилаб, унга гуруҳ хабарларини жўнатиш ва аудиожавоб юбориш функцияларини қўшди.
Шунингдек, операцион тизимда HealthKit дастури пайдо бўлди, у турли соғлиқ кўрсаткичларини ифода этади. Унда ҳар хил тиббий маълумотларни ҳам сақлаш мумкин.
Янги функциялардан яна бири Family Sharing оила аъзолари ўртасида фотосуратлар, эслатмалар, қайдларни автоматик тарзда тарқатиш имконини беради. Бундан ташқари, у орқали болаларнинг қаердалигидан хабардор бўлиш мумкин.
Siri дастури эса Shazam мусиқий композицияларни аниқлаш сервиси билан интеграциялашди.
Яна бир янги функция эса фотосуратлар устида ишлаш билан боғлиқ бўлиб, унинг ёрдамида ёрқинлик, контрастлик ва бошқа параметрлар ўзгартирилади.
Изоҳ (0)