Самарқандда ФHDЁ бўлимининг янги биноси ишга туширилди

Самарқанд вилоятининг Каттақўрғон туманида фуқаролик ҳолати далолатномаларини ёзиш бўлимининг янги биноси фойдаланишга топширилди. Бу ҳақда ЎзА хабар берди.

Шу пайтга қадар мослаштирилган бинода фаолият кўрсатиб келган Каттақўрғон туман ФHDЁ бўлими учун жорий йилда янги бино қурилишига киришилиб, бу иш қисқа фурсатда бажарилди. Бунинг учун 500 миллион сўмдан зиёд маблағ сарфланди.

– Ёшларнинг оила сари илк қадамлари фуқаролик ҳолати далолатномаларини ёзиш бўлимидан бошланади, – дейди Каттақўрғон туман ФHDЁ бўлими мудираси Раҳима Маҳмудова. – Шундай экан, бу даргоҳларнинг ҳар жиҳатдан кўркам ва гўзал бўлиши ёш оилаларнинг бахтли турмушига пойдевор бўлади. Соғлом бола йилида туманимизда шундай муҳташам бахт уйининг қад ростлаши каттақўрғонликлар учун ажойиб совға бўлди. Янги бинода ходимлар ва аҳоли учун барча шароит яратилган. Хоналар замонавий компутер техникалари, мебел жиҳозлари билан таъминланган. Никоҳни қайд этиш залининг ўзига хос салобату чиройи ёш келин-куёвларнинг мустақил ҳаётга қутлуғ ният, эзгу мақсадлар билан қадам қўйишига хизмат қилади.

Шу куни янги бинода илк бор никоҳи қайд этилган оилаларга вилоят адлия бошқармаси ва туман ҳокимлигининг эсдалик совғалари топширилди.