Samarqand viloyatining Kattaqo‘rg‘on tumanida fuqarolik holati dalolatnomalarini yozish bo‘limining yangi binosi foydalanishga topshirildi. Bu haqda O‘zA xabar berdi.
Shu paytga qadar moslashtirilgan binoda faoliyat ko‘rsatib kelgan Kattaqo‘rg‘on tuman FHDYo bo‘limi uchun joriy yilda yangi bino qurilishiga kirishilib, bu ish qisqa fursatda bajarildi. Buning uchun 500 million so‘mdan ziyod mablag‘ sarflandi.
– Yoshlarning oila sari ilk qadamlari fuqarolik holati dalolatnomalarini yozish bo‘limidan boshlanadi, – deydi Kattaqo‘rg‘on tuman FHDYo bo‘limi mudirasi Rahima Mahmudova. – Shunday ekan, bu dargohlarning har jihatdan ko‘rkam va go‘zal bo‘lishi yosh oilalarning baxtli turmushiga poydevor bo‘ladi. Sog‘lom bola yilida tumanimizda shunday muhtasham baxt uyining qad rostlashi kattaqo‘rg‘onliklar uchun ajoyib sovg‘a bo‘ldi. Yangi binoda xodimlar va aholi uchun barcha sharoit yaratilgan. Xonalar zamonaviy komputer texnikalari, mebel jihozlari bilan ta’minlangan. Nikohni qayd etish zalining o‘ziga xos salobatu chiroyi yosh kelin-kuyovlarning mustaqil hayotga qutlug‘ niyat, ezgu maqsadlar bilan qadam qo‘yishiga xizmat qiladi.
Shu kuni yangi binoda ilk bor nikohi qayd etilgan oilalarga viloyat adliya boshqarmasi va tuman hokimligining esdalik sovg‘alari topshirildi.
Izoh (0)