«Ўзбекистон нефть ва гази — 2014» кўргазмаси доирасида халқаро анжуман ўз ишини бошлади. Кўргазма амалий дастурининг муҳим таркиби бўлмиш ушбу анжуманда нефть ва газ секторини янада ривожлантиришнинг долзарб масалалари, муҳим йўналишлари ҳамда бу соҳада ҳамкорликни кенгайтириш имкониятлари етакчи экспертлар иштирокида кўриб чиқилди. Бу ҳақда «Анонс» нашри хабар берди.
Анжуманда таъкидланганидек, табиий газни қазиб чиқариш ҳажми бўйича Ўзбекистон МДҲ давлатлари ичида учинчи (Россия ва Туркманистондан кейин), дунёда эса саккизинчи ўринни эгаллайди.
Нефт ва газ соҳасида мамлакат аҳолисининг атиги бир фоизи (тахминан 125 минг киши) банд бўлса-да, ялпи ички маҳсулотнинг 16 фоизи, бюджет даромад қисмининг эса 20 фоизи унинг ҳиссасига тўғри келади.
Бугунги кунда Ўзбекистоннинг бешта нефть-газ ишлаб чиқарувчи ҳудудида 246 та углеводород кони бор. Уларнинг 48 таси сўнгги 6 йил ичида, шулардан 2 таси 2014 йил биринчи чорагида очилган.
«Ўзбекнефтьгаз» МХК томонидан Ўзбекистон нефть-газ соҳасини 2020 йилгача ривожлантириш дастури ишлаб чиқилган. Унга кўра, 2013—2020 йилларда углеводород хомашёси захирасини 622,8 миллион тоннага етказиш кўзда тутилган. Шу билан бирга, 2020 йилга келиб, табиий газни ишлаб чиқариш йилига 66 миллиард кубометрга, суюқ углеводородларни қазиб чиқариш эса 3,5 миллион тоннага етади.
Дастур жорий этилиши натижасида, мамлакат иқтисодиёти соҳаларининг табиий газ истеъмоли 2013 йилга қараганда 5—7 фоизга камаяди, аҳоли томонидан истеъмол қилиниши эса 2013 йил даражасида қолади. Ҳисоб-китобларга кўра, 2020 йилга келиб, табиий газ экспорти ҳажми 20 фоизга ошади.
Изоҳ (0)