“O‘zbekiston neft va gazi — 2014” ko‘rgazmasi doirasida xalqaro anjuman o‘z ishini boshladi. Ko‘rgazma amaliy dasturining muhim tarkibi bo‘lmish ushbu anjumanda neft va gaz sektorini yanada rivojlantirishning dolzarb masalalari, muhim yo‘nalishlari hamda bu sohada hamkorlikni kengaytirish imkoniyatlari yetakchi ekspertlar ishtirokida ko‘rib chiqildi. Bu haqda “Anons” nashri xabar berdi.
Anjumanda ta’kidlanganidek, tabiiy gazni qazib chiqarish hajmi bo‘yicha O‘zbekiston MDH davlatlari ichida uchinchi (Rossiya va Turkmanistondan keyin), dunyoda esa sakkizinchi o‘rinni egallaydi.
Neft va gaz sohasida mamlakat aholisining atigi bir foizi (taxminan 125 ming kishi) band bo‘lsa-da, yalpi ichki mahsulotning 16 foizi, byudjet daromad qismining esa 20 foizi uning hissasiga to‘g‘ri keladi.
Bugungi kunda O‘zbekistonning beshta neft-gaz ishlab chiqaruvchi hududida 246 ta uglevodorod koni bor. Ularning 48 tasi so‘nggi 6 yil ichida, shulardan 2 tasi 2014-yil birinchi choragida ochilgan.
“O‘zbekneftgaz” MXK tomonidan O‘zbekiston neft-gaz sohasini 2020-yilgacha rivojlantirish dasturi ishlab chiqilgan. Unga ko‘ra, 2013—2020-yillarda uglevodorod xomashyosi zaxirasini 622,8 million tonnaga yetkazish ko‘zda tutilgan. Shu bilan birga, 2020-yilga kelib, tabiiy gazni ishlab chiqarish yiliga 66 milliard kubometrga, suyuq uglevodorodlarni qazib chiqarish esa 3,5 million tonnaga yetadi.
Dastur joriy etilishi natijasida, mamlakat iqtisodiyoti sohalarining tabiiy gaz iste’moli 2013-yilga qaraganda 5—7 foizga kamayadi, aholi tomonidan iste’mol qilinishi esa 2013-yil darajasida qoladi. Hisob-kitoblarga ko‘ra, 2020-yilga kelib, tabiiy gaz eksporti hajmi 20 foizga oshadi.
Izoh (0)