O‘zbekistonda “suyunchi puli” miqdori oshgani maʼlum bo‘ldi

Joriy yil 1-oktyabrdan farzand tug‘ilganda beriladigan bir martalik nafaqa puli (“suyunchi puli”) miqdori oshirilgan. Bu haqda Ijtimoiy himoya milliy agentligi xabar berdi.

Oktyabrdan O‘zbekistonda farzand tug‘ilganda beriladigan bir martalik nafaqa puli 738 150 so‘mdan 811 965 so‘mga oshirildi. Bu eng kam ish haqi miqdori ko‘tarilgani bilan bog‘liq. Yaʼni 1-oktyabrdan mamlakatda mehnatga haq to‘lashning eng kam miqdori 1 155 000 so‘m etib belgilangan. “Suyunchi puli” miqdori shundan 70,3 foizini tashkil etadi.

2024-yil 1-apreldan farzand tug‘ilganda beriladigan bir martalik nafaqa puli birinchi farzandi uchun barcha ayollarga to‘lanmoqda. Ikkinchi farzand uchun esa bola tug‘ilgan paytda “Ijtimoiy himoya yagona reyestri” axborot tizimiga kiritilgan oilaning aʼzosi bo‘lgan ayollarga rasmiylashtiriladi. Qolgan barcha holatlarda farzand tug‘ilganda beriladigan bir martalik nafaqa pulini rasmiylashtirish rad etiladi.

Sentyabr oyida respublikada nafaqalar miqdori 15 foizga oshirilgandi. Ular oyiga quyidagi miqdorlarda to‘lanmoqda:

• Yoshga doir nafaqa — 745 000 so‘m;
• I guruh nogironlik nafaqasi — 1 027 000 so‘m;
• II guruh nogironlik nafaqasi — 920 000 so‘m;
• Nogironligi bo‘lgan 18 yoshgacha bolalar nafaqasi — 920 000 so‘m;
• Parvarishlash nafaqasi miqdori — 745 000 so‘m;
• Boquvchisini yo‘qotganlik nafaqasi oluvchilarning bir nafar mehnatga qobiliyatsiz oila aʼzosi uchun nafaqa miqdori — 745 000 so‘m. Keyingi har bir mehnatga qobiliyatsiz oila aʼzosi uchun — 244 000 so‘mdan qo‘shiladi;
• Dafn etish nafaqasi — 1 712 000 so‘m.

Ma’lumot uchun, 2024-yilning I yarmida respublikada ijtimoiy nafaqalar uchun jami 7,7 trillion so‘m to‘lab berilgan. Shundan 55,5 foizi bolalar nafaqasi va moddiy yordam, 40,2 foizi ijtimoiy nafaqalar uchun (yoshga doir, nogironlik, 18 yoshgacha nogironlik, parvarishlash va boquvchisini yo‘qotganlik) ajratilgan.