Maktabgacha va maktab ta’limi vaziri Hilola Umarova 2024-yilning 28-avgust kuni Toshkent shahridagi 298-maktabda OAV vakillari bilan uchrashuvda maktab oshxonalarini auksionda sotish tartibi bekor qilinganini, vazirlik buni nazoratga olganini ma’lum qilgandi. Shunga qaramasdan, Sergeli, Yangihayot va Bektemirda vazir topshirig‘iga zid ishlar olib borilayotgani ma’lum bo‘lgach, vazirlikning Toshkent shahar boshqarmasi mazkur maqolaga munosabat bildirdi va maktab oshxonalarini auksion orqali ijaraga berish to‘xtatilganini takrorladi. Olmazor tuman maktabgacha va maktab ta’limi bo‘limi mudiri Rustam Aydinov vazirlik va boshqarma boshlig‘i talabiga zid harakat qilmoqda.
Bu haqda “Daryo”ga ma’lumot bergan manbaga ko‘ra, bo‘limning xodimlar bilan ishlashga mas’uli mudir Rustam Aydinov topshirig‘i bilan tumandagi barcha maktab direktorlariga maktab oshxonalarini auksion savdoga chiqarishni so‘rab xat yozishga majburlamoqda.
29-, 146-, 219-, 224-, 278-maktablardan tashqari barcha maktab direktorlari diqqatiga! Ertaga (15-oktyabr sanasi nazarda tutilmoqda) soat 13:00 ga qadar namunada ko‘rsatilgan ma’lumot va obyekt pasportni maktabingizga to‘g‘rilab (firmenniy blankaga yozib) imzo hamda muhr qo‘yib, MMTB kadrlar xonasiga shaxsan o‘zingiz olib kelib topshirishingiz so‘raladi. Menejerlik o‘qishida o‘qiyotgan direktorlar, o‘qishdan chiqqaningizdan so‘ng quyidagi ma’lumotnoma va obyekt (maktab) pasportini imzo, muhr qo‘yib o‘zingiz olib kelib soat 17:00 ga qadar topshirishingiz so‘raladi, deydi direktorlarga Telegram guruhi orqali topshiriq bergan mas’ul Ra’noxon Ahmedova.
Ra’no Ahmedova bo‘limda xodimlar yo‘riqchisi sifatida ishlab kelishini tasdiqlab, direktorlarga Telegram orqali bergan topshirig‘ini tan oldi. Biroq bu topshiriq mazmun-mohiyatini uncha tushunmasligini, mudir aytgani uchun bajarayotganini bildirdi.
Bu nima topshiriq ekanini bilmayman. Menga mudir shunday topshiriq bergani uchun direktorlardan xat so‘rayapman. Vazir buni taqiqlaganmi, men hozir mudirdan so‘rayman, deydi “Daryo” jurnalistining savollariga javob qaytargan mas’ul.
Olmazor tuman maktabgacha va maktab ta’limi bo‘limi mudiri Rustam Aydinov jurnalistning bu haqdagi savollariga javob berar ekan, “bundan xabarim yo‘q ekan, hozir surishtirib, aniq ma’lumot beraman”, dedi. Biroq shundan so‘ng mudir ham, Ra’noxon Ahmedova ham telefon qo‘ng‘iroqlariga javob qaytarmadi.
Vazirlikning Toshkent shahar boshqarmasi axborot xizmati vaziyatni izohlar ekan, maktab oshxonalarini auksion orqali ijaraga berish tartibi bekor qilinganini, vazirlik va boshqarma bunday harakatga qarshi ekanini eslatdi. Shuningdek, Olmazordagi holat nazoratga olinganini qo‘shimcha qildi.
“Daryo” voqealar rivojini kuzatishda davom etadi.
Izoh (0)