Shavkat Mirziyoyev Respublika ixtisoslashtirilgan ona va bola salomatligi ilmiy-amaliy tibbiyot markazining 50 yilligi munosabati bilan ushbu markaz jamoasiga tabrik yo‘lladi.
“Ushbu qutlug‘ ayyomda Yangi O‘zbekistonda ona va bola salomatligini himoya qilish orqali milliy genofondimizni asrash, yosh avlodni sog‘lom va barkamol etib tarbiyalashdek g‘oyat sharafli ishga munosib hissa qo‘shib kelayotgan Markazning ko‘pmillatli ahil jamoasi – jonkuyar shifokorlar, olim va mutaxassislar, zahmatkash hamshiralarga fidokorona mehnati uchun samimiy minnatdorlik bildiraman” deyiladi prezident matbuot xizmati e’lon qilgan tabrikda.
Respublika ixtisoslashtirilgan ona va bola salomatligi ilmiy-amaliy tibbiyot markazi uchta muassasa negizida 2023-yilning oktyabrida tashkil etilgandi. Prezidentning ta’kidlashicha, bu ona-bola salomatligini mustahkamlash yo‘lidagi katta qadam bo‘ldi.
“Natijada mamlakatimizda 9 million 200 ming nafardan ziyod tug‘ish yoshidagi ayollarga sifatli tibbiy xizmat ko‘rsatish hamda homila salomatligini nazorat qilib borishning yaxlit va vertikal boshqarish tizimi yaratildi, takomillashtirilgan tibbiy profilaktika hamda patronaj xizmatlari yo‘lga qo‘yildi”, deyiladi tabrikda.
Bugungi kunda markaz o‘z tarkibida 14 ta hududiy filial, 46 ta tumanlararo perinatal markaz, 170 dan ortiq tug‘ruq kompleksi va 209 ta Ayollar maslahatxonasini birlashtirgan. Bu muassasalar ishini samarali muvofiqlashtirib, birlamchi tizimda patronaj xizmatini sifatli yo‘lga qo‘yish, homilador ayollarni skriningdan o‘tkazib, ularning salomatligini muntazam tahlil qilib borish,, xavfsiz onalikni ta’minlash imkonini bermoqda.
Markaz dunyodagi yetakchi tibbiyot markazlari bilan yaqin hamkorlik aloqalarini yo‘lga qo‘yib, tibbiy diagnostika va davolashning ilg‘or usullarini klinik amaliyotga keng joriy etmoqda.
“Xususan, ginekologiya yo‘nalishida yiliga 1300 dan ortiq jarrohlik operatsiyalari muvaffaqiyatli amalga oshirilayotgani, 36 turdagi yuqori texnologik operatsiyalar yo‘lga qo‘yilgani qancha-qancha yurtdoshlarimizni ortiqcha vaqt va mablag‘ sarflab, chet elga borib davolanish tashvishidan xalos etmoqda”, deyiladi tabrikda.
Respublika ixtisoslashtirilgan ona va bola salomatligi markazi O‘zbekistondagi davlat davolash muassasalari orasida birinchi bo‘lib xalqaro akkreditatsiyadan o‘tgani uning nufuzi nafaqat O‘zbekistonda, balki xorijda ham ortib borayotganini ko‘rsatadi.
“Inson, jumladan, ona va bola salomatligiga nisbatan xavf-xatarlar tobora ko‘payib borayotgan hozirgi murakkab zamonda bu borada oldimizda yanada dolzarb vazifalar paydo bo‘lmoqda. Bu esa barchamizdan har qachongidan ham ko‘proq mehnat, izlanish va safarbarlikni talab etmoqda.
Ushbu sohaning fidoyi vakillari bo‘lgan siz, azizlar buni chuqur anglagan holda, o‘z bilim va tajribangiz, malaka va mahoratingiz bilan el-yurtimizga yanada faol xizmat qilasizlar, deb ishonaman.
O‘z navbatida, soha rivojiga alohida ahamiyat berish, sizlarning sharafli mehnatingizni munosib rag‘batlantirish bundan buyon ham davlatimizning e’tibor markazida bo‘ladi”, deyiladi tabrikda.
Prezident 17-oktyabr kuni “Respublika ixtisoslashtirilgan ona va bola salomatligi ilmiy-amaliy tibbiyot markazining 50 yilligi munosabati bilan bir guruh xodimlarni mukofotlash to‘g‘risida”gi farmonni imzolagandi.
Izoh (0)