O‘zbekiston Markaziy bankining oltin-valyuta zaxiralari 2,9 mlrd dollarga oshib, rekord daraja — 47,85 mlrd dollarga yetgani ma’lum qilindi.
Markaziy bank e’lon qilgan hisobotda 2025-yil mart oyi yakunlariga ko‘ra, chet el valyutasidagi zaxiralar 9,5 mlrd dollardan 10,4 mlrd dollargacha oshdi. Regulyatorning xalqaro qimmatli qog‘ozlardagi aktivlari ham 202,5 mln dollardan 203,1 mln dollargacha ko‘paydi.
Oltinning zaxiralardagi qiymati 34,9 mlrd dollardan 36,9 mlrd dollargacha ko‘tarilgan bo‘lsa-da, uning jismoniy hajmi 12,2 mln dan 11,8 mln troya unsiyasigacha kamaydi. Mart oyida oltin narxlari 9,6 foizga o‘sib, oy oxirida 1 troya unsiyasi uchun 3,120 dollarga yetdi. Mart oyida oltin narxi 9,2 foizga oshdi: 2857,78 dollardan 3120,93 dollargacha.
Bu 2013-yildan buyon butun davr uchun rekord ko‘rsatkich.
Tarixda ilk bor oltin narxi bir unsiya uchun 3200 dollardan oshdi. 2-apreldagi savdo yakunlariga ko‘ra, oltin narxi 3166,2 dollarni tashkil etdi. Bu bir kun oldingi darajadan 0,64 foizga yuqori. Oltin bozoridagi keskin o‘sish AQSH prezidenti Donald Tramp yangi import bojlarini e’lon qilganidan keyin kuzatildi. O‘zbekiston tovarlariga ham 10 foizlik boj solinmoqda. Ba’zi mamlakatlarga nisbatan bojlar miqdori esa 50 foizga yetgan.
Oltin narxi bo‘yicha prognozlar
Qimmatbaho metall qiymati 2025-yil allaqachon 21 foizdan ko‘proqqa oshdi. O‘tgan yili oltin qiymati bir qator omillar, jumladan, qulay pul-kredit siyosati va markaziy banklarning faol xaridlari, investorlarning xavfsiz aktivlariga bo‘lgan talabi tufayli 27 foizdan oshgandi.
Goldman Sachs kabi bir nechta yirik banklar oltinning maqsadli narxlarini yuqoriga ko‘tardi. Goldman Sachs tahlilchilari yil oxiriga kelib oltin narxi bir unsiya uchun 3300 dollarga yetishini prognoz qilmoqda. Mutaxassislar markaziy banklar tomonidan oltinga bo‘lgan talab ilgari prognoz qilinganidan yuqori bo‘lishini kutmoqda.
Morgan Stanley tahlilchilari ham oltin bozoridagi o‘sish hali tugamaganini va 2025-yilda oltin narxi bir unsiya uchun 3400 dollarga yetishi mumkinligini aytgan.
Izoh (0)