Xitoyning Hunan Industrial Equipment Installation kompaniyasi M41 Bishkek—Dushanbe—Termiz avtomobil yo‘liga parallel yo‘nalishda 171 kilometr uzunlikka ega bo‘lgan pullik yo‘l qurishga katta qiziqish bildirmoqda. Bu haqda Surxondaryo viloyati hokimligi matbuot xizmati xabar berdi.
Maʼlumotlarga ko‘ra, Xitoy kompaniyasi yo‘lsozlikda 66 yillik boy tajribaga ega bo‘lib, o‘tgan yillarda 40 ming kilometrdan ortiq uzunlikdagi yuqori sifatli pullik yo‘l bunyod etgan.
Surxondaryo viloyat hokimi Ulug‘bek Qosimov yirik kompaniya vakillarini qabul qilib, zamonaviy pullik avtomagistral yo‘l qurilish loyihasi bilan tanishgan. Qurilishning ekologik va iqtisodiy jihatlariga eʼtibor qaratib, turar joylar va dov-daraxtlar ko‘chirilishini eng past darajaga tushirish, loyihaning tabiatga taʼsirini imkon qadar kamaytirish masalalarini muhokama etgan.
O‘zAning yozishicha, ayni paytda M41 Bishkek—Dushanbe—Termiz avtomobil yo‘li o‘rnida pullik yo‘l qurish loyihasi ham mavjud. Biroq loyihani amalga oshirish uchun mingdan ortiq uy-joy, 60 mingdan ziyod daraxtni ko‘chirish zarur bo‘ladi. Bu moliyaviy va qator ekologik masalalarni o‘rtaga tashlashi mumkin. Shuning uchun mazkur yo‘lga muqobil ekologik va moliyaviy taʼsiri kam yo‘lni qurish ko‘zda tutilmoqda.
Muzokara yakunida tajribali mutaxassislarni jalb etgan holda loyihani takomillashtirib, mukammal qayta ishlab chiqish yuzasidan hamkorlikni davom ettirishga kelishildi, — deyiladi xabarda.
O‘zbekistondagi ilk pullik yo‘llarning qurilishi haqida 2018-yilda xabar berilgandi. O‘shanda bu kabi yo‘llarning birinchisini qurish bilan Germaniyaning GP Günter Papenburg kompaniyasi shug‘ullanishi mumkinligi aytilgandi. 2019-yilda Avtomobil yo‘llari qo‘mitasi O‘zbekistondagi ilk pullik trassani qurish uchun joy tanlanayotganini ma’lum qilgandi.
2023-yilda Turkiyaning Cengiz Holding kompaniyasi O‘zbekistonda pullik avtomobil yo‘llarini qurish loyihalarida ishtirok etishga qiziqish bildirdi.
Izoh (0)