Namangan va Samarqand viloyatlarida elektr tarmoqlariga noqonuniy ulanish holatlari fosh etilmoqda, deb xabar beradi Bosh prokuratura huzuridagi departament.
Qayd etilishicha, departamentning Yangi Namangan tuman bo‘limi tomonidan tergovga qadar tekshiruv o‘tkazilgan. Tekshiruvda “Y.B.” xususiy korxonasi tomonidan ijara shartnomasi asosida foydalanib kelayotgan savdo do‘konida umumiy foydalanishdagi elektr tarmog‘iga o‘zboshimchalik bilan ulanib, jami 138,5 million so‘mlik elektr energiyasidan noqonuniy foydalanilgani aniqlangan.
Shu kabi, departamentning Ishtixon va Jomboy tumani bo‘limlari tomonidan o‘tkazilgan tergovga qadar tekshiruvlarda YATT A.T.ning savdo do‘koni va “S.k.” oilaviy korxonasining umumiy ovqatlanish shoxobchasida elektr tarmoqlariga o‘zboshimchalik bilan ulanib, jami 103,6 million so‘mlik elektr energiyasidan noqonuniy foydalanilgani ma’lum bo‘lgan.
Ishtixon tuman ETKning Elektr tarmoqlarini qurish va rivojlantirish bo‘limi sobiq boshlig‘i S.K. YATT A.T.ning do‘koniga elektr hisoblagich o‘rnatib, hujjatlarini rasmiylashtirib berishi evaziga 2,6 million so‘mini firibgarlik yo‘li bilan qo‘lga kiritgani aniqlanib, S.K. tomonidan 1 million so‘mning qaytarilishi protsessual tartibda rasmiylashtirilgan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Aprel boshlarida Surxondaryo viloyatining Denov, Qashqadaryo viloyatining Muborak hamda Farg‘ona viloyatining Marg‘ilon shahrida gazdan noqonuniy foydalanish holatlari fosh etilgan, Andijonda 1,3 mlrd so‘mlik elektr energiyasidan noqonuniy foydalangan ishlab chiqarish sexi aniqlangani to‘g‘risida xabar berilgan edi.
Izoh (0)