O‘zbekistonda ishlab chiqarilayotgan avtomashinalar ehtiyot qismlarining 70-75 foizini mahalliylashtirish rejalashtirilgan. Bu haqda “O‘zavtosanoat” AJ boshqaruvi raisi o‘rinbosari Davron Hidoyatov Toshkent shahrida bo‘lib o‘tgan III Xalqaro investitsiya forumi yakunlari bo‘yicha “Daryo” muxbiriga bergan qisqacha intervyusida ma’lum qildi.
Davron Hidoyatovning aytishicha, “O‘zavtosanoat” AJ investorlar uchun hamisha ochiq va asosan chet ellik kompaniyalar bilan ishlab kelmoqda.
Hozir mahalliylashtirishni 50 foizdan oshirganmiz. Bu chegara emas. Muhtaram prezidentimiz avtomobil narxlarini arzonlashtirish bo‘yicha topshiriq bergan. Narxni qachon arzonlashtiramiz? Qachonki ehtiyot qismlarini ishlab chiqarishni mahalliylashtirsak. Buning darajasini 50 foiz emas, 70-75 foizga olib chiqishimiz kerak. Bu bo‘yicha hozirgi kunda investorlar bilan muzokaralar o‘tkazilmoqda, — dedi “O‘zavtosanoat” AJ vakili.
Uning aytishicha, “O‘zavtosanoat” III Xalqaro investitsiya forumida umumiy qiymati 25 million dollarlik mahalliylashtirish bo‘yicha to‘rtta loyiha kelishilgan.
Bunda bir qator avtomashinalarning ehtiyot qismlarini ishlab chiqarish ko‘zda tutilgan. Ya’ni Xitoy va Yaponiya bilan bittadan va Janubiy Koreya bilan ikkita shartnoma imzoladik, — dedi Davron Hidoyatov.
Ta’kidlanishicha, forum davomida “O‘zavtosanoat” AJ ekspert bo‘yicha ham umumiy qiymati 45 million dollarlik shartnoma imzolagan.
Izoh (0)