O‘zbekistonning JSTga aʼzo bo‘lishi yuzasidan ishchi guruhning Jenevada bo‘lib o‘tgan sakkizinchi yig‘ilishida mamlakatning ushbu tashkilotga qo‘shilish uchun zarur islohotlarni amalga oshirish borasidagi saʼy-harakatlari yuqori baholandi. Bu haqda tashkilot matbuot xizmati xabar berdi.
“O‘zbekiston Jahon savdo tashkilotiga a’zo bo‘lish qarorida qat’iy va biz sezilarli taraqqiyotga erishish uchun barcha imkoniyatlarni ishga solamiz”, — degan tadbirda ishtirok etgan O‘zbekiston bosh vazirining o‘rinbosari Jamshid Xo‘jayev 2026-yilda Kamerunda bo‘lib o‘tadigan JST vazirlarining 14-konferensiyasigacha tashkilotga a’zo bo‘lishni nazarda tutib.
Jamshid Xo‘jayev yig‘ilishda ishtirok etayotgan delegatsiya a’zolarini O‘zbekistonning JSTga a’zo bo‘lish borasidagi harakatlarini qo‘llab-quvvatlashga chaqirdi. Ularning hamkorligi, tajribasi va yordami bu boradagi muzokaralarining muvaffaqiyatli yakunlanishida hal qiluvchi ahamiyatga egaligini ta’kidladi.
Ishchi guruh raisi, Koreya Respublikasi elchisi Yun Son Dok muzokaralar sur’ati tezlashganini aytdi.
“Bugun biz yettinchi uchrashuvimizdan atigi olti oy o‘tib uchrashyapmiz. Ishchi guruh yig‘ilishlari oralig‘ining qisqargani faoliyatimiz jadal sur’atlar bilan rivojlanayotganidan dalolatdir”, — degan u.
U O‘zbekistonning muzokaralardagi muvaffaqiyatini yuqori baholadi va tashkilotga aʼzo bo‘lish jarayoni yangi bosqichga o‘tganini taʼkidladi.
Adliya vaziri o‘rinbosari Alisher Karimov yettinchi yig‘ilishdan so‘ng O‘zbekiston o‘z savdo tizimini turli sohalarda JST qoidalariga muvofiqlashtirishga qaratilgan bir qancha qonun hujjatlarini qabul qilganini qayd etib o‘tdi.
O‘zbekistonning JSTga a’zo bo‘lishi bo‘yicha ishchi guruh 1998-yilda tashkil etilgan edi. Keyingi yillarda ushbu ishchi guruh faqat uch marta uchrashdi va 2005-yillarning o‘rtalariga kelib bu borada xalqaro ekspertlar bilan uchrashuvlar to‘xtab qolgandi.
O‘zbekistonning JSTga a’zo bo‘lish jarayoni 2020-yil iyul oyida bo‘lib o‘tgan ishchi guruhning to‘rtinchi yig‘ilishi bilan rasman qayta tiklandi. Shundan so‘ng 2022-yil iyun, 2023-yil mart va 2023-yil noyabr oylarida yana uchta uchrashuv bo‘lib o‘tdi.
2023-yil sentyabrida Shavkat Mirziyoyev BMT Bosh assambleyasining 78-sessiyasi doirasida Jahon savdo tashkiloti (JST) bosh direktori Ngozi Okonjo-Iveala bilan uchrashuv o‘tkazgandi. Unda JST bosh direktori O‘zbekiston tomonidan tashkilotga a’zo bo‘lish borasida ko‘rilayotgan choralarni yuqori baholagan. Ngozi Okonjo-Iveala JST kotibiyati O‘zbekistonning sa’y-harakatlarini to‘liq qo‘llab-quvvatlashini aytgan hamda mamlakat yaqin kelajakda tashkilotga qo‘shilishiga ishonch bildirgandi.
Izoh (0)