Hindiston hukumati 21-avgust kuni pul tikilgan onlayn o‘yinlarni taqiqlash to‘g‘risidagi qonun loyihasini qabul qildi. Bu haqda Reuters xabar berdi.
Tahlilchilarning fikricha, yangi qonun milliardlab dollarlik xorijiy investitsiyalarni jalb qilgan soha uchun katta zarba bo‘ladi. Qonun “zararli” deb baholangan onlayn pulli o‘yin xizmatlarini, ularning reklamasi va ularga bog‘liq moliyaviy operatsiyalarni taqiqlaydi. Hukumat bunday o‘yinlar fuqarolarning psixologik holati va moliyaviy barqarorligiga salbiy ta’sir ko‘rsatayotganini ta’kidlagan.
Qonun loyihasi ma’qullangani ortidan Hindistonning eng yirik o‘yin kampaniyalaridan biri — Nazara Tech aksiyalari keskin tushib ketgan. Xususan, aksiyalar 20-avgust kuni 11 foizga, keyingi kun esa umumiy hisobda 21 foizga arzonlashib, tarixidagi eng katta ikki kunlik pasayishni qayd etgan.
Shuningdek, Delta Corp kabi boshqa o‘yin kampaniyalari ham zarar ko‘rgan. Ularning aksiyalari dastlab 3 foiz, keyin yana 2 foizga tushgan.
Lumikai venchur kapital firmasi hisob-kitoblariga ko‘ra, Hindistondagi onlayn pulli o‘yinlar bozori 2029-yilga borib 3,6 milliard dollarga yetishi kutilayotgan edi. Endilikda esa ushbu sohaning kelajagi jiddiy savol ostida qolmoqda.
Izoh (0)