Қашқадарё вилоят судининг иқтисодий ишлар бўйича судлов ҳайъати тафтиш инстанциясида кутилмаган ҳолат рўй берди. Жавобгар “Самандар нур” фермер хўжалигининг даъвогар “Агробанк” АТБга нисбатан иқтисодий иш бўйича Қарши туманлараро иқтисодий судининг 2023 йил 2 августдаги ҳамда Қашқадарё вилоят суди иқтисодий ишлар бўйича судлов ҳайъати кассация инстанциясининг 2024 йил 15 августдаги қарорларининг бекор қилиниши сўраб ёзилган тафтиш шикоятини кўриб чиқаётган судлов ҳайъати таркибида музокара босқичида ўзгариш бўлди. Раислик этувчи тўсатдан таътилга чиқиб, ўрнини бошқа судья эгаллади. Бу ҳақда судда қатнашган “Дарё” мухбири хабар берди.
2024 йилнинг 1 ноябрь куни бўлиб ўтган навбатдаги суд мажлисида судлов ҳайъатига раислик этувчи Астанов ўрнини судья Бозоровнинг эгаллаши фермер томонидан судьяни рад этишга сабаб бўлди. Бироқ янгиланган судлов ҳайъати “отвод”ни рад этди. Шундан сўнг фермер ишни бошқа судга ўтказишни сўраб 2024 йил 4 ноябрда Олий судга ариза ёзди.
Иқтисодий процессуал кодекснинг 324-3-моддасига асосан тафтиш тартибидаги шикоят Қорақалпоғистон Республикаси суди, вилоятлар, Тошкент шаҳар судлари томонидан тафтиш тартибидаги шикоятни иш юритувга қабул қилиш тўғрисида ажрим чиқарилган кундан эътиборан бир ойдан ортиқ бўлмаган муддатда кўриб чиқилиши алоҳида ҳолларда шикоятни кўриб чиқиш муддати ишни кўраётган судлов ҳайъати томонидан кўпи билан бир ойга узайтирилиши мумкинлиги белгиланган.
Тафтиш тартибидаги шикоятни иш юритувга қабул қилиш тўғрисида ажрим 2024 йил 4 сентябрда чиқарилган бўлиб, узайтирилиш билан боғлиқ қўшимча бир ойлик муддат ҳам ўтиб кетди. Бироқ Қашқадарё вилояти суди иқтисодий ишлар бўйича судлов ҳайъати томонидан асоссиз равишда ишни кўриб якуний қарор чиқариш кечиктириб келинмоқда.
Бугунги кунда қўшимча узайтириш билан ҳам муддатнинг тўлиқ ўтиб кетгани иш бўйича процессуал муддатлар ва ҳаракатлар тўлиқ равишда бузилганини кўрсатади. Иккинчидан, 2024 йил 1 ноябрдаги суд мажлисида иш мазмунан кўриб чиқилиши белгилангани ҳамда суд мажлисида музокара қилиш вақти келган пайтда суд таркибида ўзгариш бўлгани айтилди. Шунингдек, суд таркибида ўзгарган судья Бозоров (раислик қилувчи) аввалдан менинг мазкур иш билан чамбарчас боғлиқ даъво предметларимни рад қилгани учун унинг холислигига менда шубҳа туғилмоқда.
Шу сабабли Иқтисодий процессуал кодекснинг 20-моддасига асосан мазкур судьяни рад қилишни сўраб берган илтимосномам судлов ҳайъати томонидан янги таркибни шакллантириш имкони йўқлиги сабабли рад этилди, дейди фермер.
Тадбиркор-фермернинг эслашича, аввалроқ судья Бозоров раислигидаги Қашқадарё вилоят суди иқтисодий ишлар бўйича судлов ҳайъати тафтиш инстанцияси қарори билан “Самандар нур” фермер хўжалигининг зарарни ундириш бўйича жавобгар МИБ Нишон туман бўлимидан ундирилиши белгиланган 355 миллион сўм миқдордаги Қарши туманлараро иқтисодий суди томонидан қаноатлантирилган қарори асоссиз равишда бекор қилинган. Мазкур апелляция инстанцияси қарори 2024 йил 1 август куни Самарқанд вилоят суди иқтисодий ишлар бўйича судлов ҳайъати тафтиш инстанцияси томонидан тўлиқ бекор қилиниб, “Самандар нур” фермер хўжалиги фойдасига қарор қабул қилинган.
Мазкур ҳолатни судья Бозоров томонидан ушбу иқтисодий ишни кўришда унинг холислигига тўлиқ шубҳа туғдирувчи ҳолат сифатида баҳолайман ҳамда ишни ҳар тарафлама адолатли кўришига тўлиқ ишончим йўқ, дейди фермер.
Изоҳ (0)