Qamchiq dovonida 6-noyabr kuni soat 4:55 larda yog‘ingarchilik oqibatida ko‘chki yuz berdi. Bu haqda Favqulodda vaziyatlar vazirligi xabar bermoqda.
Vazirlik matbuot xizmatining xabar qilishicha, joriy yilning 6-noyabr kuni soat 4:55 larda A-373 avtomobil yo‘lining Qamchiq dovoni hududidan o‘tuvchi 238,5-kilometrida Vodiy—Toshkent yo‘nalishida tog‘ qiyaligidan yog‘ingarchilik natijasida namlanish hisobiga nomustahkam tosh-tuproq aralashmasi ko‘chkisi kuzatilgan.
Ko‘chki yo‘lning xandaq qismiga tushgan bo‘lib, harakat xavfsizligiga ta’sir yetmagan.
Hodisa natijasida tan jarohati olganlar yo‘q.
Voqea joyida “Qamchiqavtoyo‘l” IYFUK kuch va vositalari bilan ko‘chki massalari tozalangan. Qamchiq Maxsus qidiruv, yong‘in-qutqaruv boshqarmasi va yo‘l patrul xizmati otryadi xodimlari tomonidan avtomobil yo‘lida xavfsizlik choralari ko‘rilgan.
“Dovon orqali harakatlanuvchi haydovchilardan xavfli uchastkalarga transport vositalarini to‘xtatmaslikni hamda ogohlantiruvchi va taqiqlovchi belgilarga rioya etishlarini so‘raymiz”, deyiladi xabarda.
3-noyabr va 5-noyabr kunlari Qamchiq dovonida harakatlanayotgan yuk avtomobillarida yong‘in yuzaga kelgani haqida xabar berilgandi.
Izoh (0)