Fevral oyida Jizzaxda Vaqtincha saqlash hibsxonasi boshlig‘i 5 ming dollar pora olayotganida ushlangani haqida xabar berilgan edi. Mazkur ish jinoyat ishlari bo‘yicha Forish tumani sudida ko‘rib chiqildi.
Sharof Rashidov tumani Ichki ishlar bo‘limi Vaqtincha saqlash hibsxonasi boshlig‘i ayblov eʼlon qilinib, mazkur hibsxonada saqlanayotgan shaxsga nisbatan jinoyat ishini ko‘rib chiqayotgan sudya tomonidan ozodlikdan mahrum qilish bilan bog‘liq bo‘lmagan jazo tayinlanishida yordam berishi evaziga 10 ming dollar talab qilgan.
Davlat xavfsizlik xizmati xodimlari tomonidan o‘tkazilgan tezkor tadbirda u so‘ralgan pul mablag‘idan 5 ming dollarni olgan vaqtida ushlangan.
Tergovga qadar tekshiruv davomida, mazkur mansabdor shaxs muqaddam o‘z xizmat mavqeyidan foydalanib, hibsxonada saqlanayotgan ushbu fuqaroning oila-aʼzolari bilan uchrashishi hamda uyidan olib kelingan oziq-ovqat mahsulotlarining kiritilishi uchun ruxsat berish evaziga 400 dollar olgani ham maʼlum bo‘lgan.
Sud hukmiga ko‘ra, ayblanuvchi Jinoyat kodeksining 59-moddasi (bir necha jinoyat sodir etganlik uchun jazo tayinlash) va 61-moddasi (jazolarni qo‘shishning hisoblash qoidalari) bilan 2 yil 6 oy IIV tizimida mansabdor va moddiy javobgarlik lavozimlarida ishlash huquqidan mahrum etilgan.
Bundan tashqari, unga 6 yil-u 6 oy ozodlikdan mahrum qilish jazosi berilgan.
Izoh (0)