Oliy sud sobiq qishloq xo‘jaligi vaziri Aziz Voitov va boshqalarga oid jinoyat ishini ko‘rib chiqish bo‘yicha ochiq sud jarayoni 5-sentyabr kuni boshlanishini e’lon qildi.
Ma’lum qilinishicha, 15-avgust kuni jinoyat ishlari bo‘yicha Mirobod tuman sudining ish yurituvida bo‘lgan Aziz Voitov va boshqalarga hamda jinoyat ishlari bo‘yicha Shayxontohur tuman sudining ish yurituvida bo‘lgan X.Karimov (Qishloq xo‘jaligi vazirligi huzuridagi Qishloq xo‘jaligida xizmatlar ko‘rsatish agentligi direktori lavozimida ishlagan) va boshqalarga oid jinoyat ishlarini bitta ish yurituviga birlashtirish yuzasidan dastlabki eshituv o‘tkazildi.
Dastlabki eshituv Jinoyat-protsessual kodeksining 405-6-moddasi talabiga muvofiq yopiq sud majlisida o‘tkazilib, uning natijasi bo‘yicha ikkita jinoyat ishi bitta ish yurituviga birlashtirildi.
Aziz Voitov va boshqalarga (jami 50 kishi) oid jinoyat ishini jinoyat ishlari bo‘yicha Mirobod tuman sudi tomonidan birinchi instansiyada ko‘rib chiqish bo‘yicha ochiq sud jarayoni 5-sentyabr kuni soat 15:00 da jinoyat ishlari bo‘yicha Yunusobod tuman sudi binosida boshlanadi.
Tergov organining ayblov xulosasiga ko‘ra sudlanuvchilar Jinoyat kodeksining 167, 168, 184, 185-2, 189, 205, 206, 28,209, 209, 211, 228 va 243-moddalarida nazarda tutilgan jinoyatlarni sodir etganlikda ayblanmoqda.
Sudlanuvchilarning 29 nafariga nisbatan qamoqqa olish, 15 nafariga garov va 6 nafariga munosib xulq-atvorda bo‘lish haqidagi tilxat tarzidagi ehtiyot choralari qo‘llanilgan.
2022-yil avgust oyidan qishloq xo‘jaligi vaziri lavozimida ishlab kelgan Aziz Voitov prezidentning tegishli qarori bilan 2023-yilning 25-oktyabrida lavozimidan olingandi. U iqtisodiy jinoyatlar bilan bog‘liq ish doirasida 2023-yilning dekabrida qamoqqa olinib, tergov hibsxonasiga joylashtirildi.
Izoh (0)