Hukumatning “Majburiy raqamli markirovkalash lozim bo‘lgan tovarlarning chakana savdosini tartibga solish to‘g‘risida”gi qarori qabul qilindi.
Unga ko‘ra, 2024-yil 1-sentyabrga qadar alkogol, tamaki va pivo mahsulotlari, maishiy texnika va dori vositalari chakana savdosi bilan shug‘ullanayotgan tadbirkorlik subyektlarining “Asl belgisi” milliy axborot tizimidan ro‘yxatdan o‘tgani hamda raqamli markirovkalash talablariga rioya etilayotgani nazoratga olinadi.
Raqamli markirovkalanishi lozim bo‘lgan tovarlarning chakana savdosi bilan shug‘ullanuvchi tadbirkorlik subyektlari o‘z faoliyatini to‘xtatmoqchi bo‘lganda, tuman (shahar) soliq inspeksiyasini bir oy oldin xabardor qilish tartibi joriy etiladi.
Bunda soliq inspektori uch ish kunida chakana savdo huquqi uchun yig‘imlarning to‘liq to‘langani hamda alkogol, tamaki va pivo mahsulotlarining ombordagi qoldiqlarini xatlovdan o‘tkazadi.
Soliq qo‘mitasi 2026-yil 1-avgustga qadar qalbaki raqamli markirovkalangan va/yoki kontrafakt mahsulotlarni import qiluvchi, ishlab chiqaruvchi hamda ulgurji va chakana realizatsiya qiluvchi subyektlarga nisbatan mazkur mahsulotlarni musodara qilgan holda, jinoiy javobgarlikka tortish normalarini belgilashni nazarda tutuvchi normativ-huquqiy hujjat loyihasini Vazirlar Mahkamasiga kiritishi lozim.
Qo‘mitaning belgilangan umumiy shtat birliklari doirasida 7 ta shtat birligidan iborat alohida tuzilma tashkil etiladi hamda raqamli markirovkalash qoidalariga rioya etilishini nazorat qilish, yashirin ishlab chiqarish faoliyati va qalbaki tovarlar tarqalishiga qarshi kurashish orqali soliq tushumlarini to‘liq ta’minlash mazkur tuzilmaning asosiy vazifalaridan biri etib belgilanadi.
2024-yil 1-noyabrga qadar raqamli markirovkalanadigan mahsulotlarning ulgurji savdosini faqat naqd pulsiz shaklda sotish talabini belgilashni nazarda tutuvchi normativ-huquqiy hujjat loyihasi, 2024-yil 1-dekabrgacha esa “Savdo to‘g‘risida”gi qonun loyihasi Vazirlar Mahkamasiga kiritilishi lozim.
Qarorda belgilanishicha, Raqobat qo‘mitasi onlayn nazorat-kassa mashinasi va virtual kassaga ulangan shtrix-kodlar va raqamli markirovka kodlarini to‘g‘ri o‘qishni va aniqlashni ta’minlovchi maxsus qurilmalarning narxlari sun’iy ravishda oshib ketishining oldini oladi.
Marketpleyslar uchun markirovka qoidalarini buzganlik uchun jazo choralarini joriy qilish bo‘yicha takliflar ishlab chiqiladi.
Iyunda imzolangan prezident qaroriga ko‘ra, majburiy raqamli markirovkalanishi lozim bo‘lgan mahsulotlarni markirovkalash uchun zarur bo‘lgan va import qilinadigan uskunalar 2024-yil 1-iyundan 2027-yil 1-iyungacha bojxona bojidan ozod qilindi.
2024-yil 1-sentyabrdan pivo mahsulotlarining chakana savdosi faoliyati vakolatli organlarni xabardor qilish tartibida amalga oshiriladigan faoliyat turlari ro‘yxatiga kiritiladi. Tamaki va pivo mahsulotlari bilan chakana savdo qilish huquqi uchun BHMning 10 foizi miqdoridagi har oylik yig‘im joriy etiladi.
Raqamli markirovkalash — bu mahsulot haqidagi ma’lumotlarni elektron bazada saqlaydigan tovarlarni qadoqlash uchun maxsus Data Matrix kodini qo‘llashdir. Natijada har bir kishi tovar sifatini tekshirish va kuzatish imkoniyatiga ega bo‘ladi. Shu maqsadda iste’molchilarga sifatsiz mahsulotlar haqida xabar berish va kerakli ma’lumotlarni olish imkonini beruvchi “Asl belgisi” mobil dasturi yaratilgan.
Izoh (0)