Turkiyada koronavirus bilan kasallanish holatlari ortgani sabab 12-noyabrdan odam ko‘p to‘planadigan ko‘chalar va jamoat transportlari bekatlarida sigaret chekish taqiqlandi. Bu haqda mamlakat Ichki ishlar vazirligiga tayanib, “RIA Novosti” xabar berdi.
“Avvalroq e’lon qilingan farmoyishda barcha jamoat joylarida, turar joy binolaridan tashqari, fuqarolar hech qanday istisnosiz niqob taqishi majburiy etib belgilangandi. Biroq shu kabi joylarda sigaret chekmoqchi bo‘lgan insonlar niqoblarini yechmoqda, pastga tushiryapti, ulardan to‘g‘ri foydalanmayapti. Shu sababli 12-noyabrdan barcha viloyatlardagi odam ko‘p to‘planadigan ko‘chalar va jamoat transporti bekatlarida chekishga taqiq o‘rnatiladi”, — deyiladi xabarda.
Ta’kidlanishicha, “havo orqali osonlikcha yuqadigan koronavirusning tarqalishini oldini olishda niqoblarning uzluksiz taqilishini ta’minlash juda muhim”.
Eslatib o‘tamiz, sentabr oyi boshlarida Turkiya sog‘liqni saqlash vaziri Faxriddin Koja mamlakat koronavirus infeksiyasi tarqalishining ikkinchi to‘lqinini boshidan o‘tkazayotganini ma’lum qilgandi. O‘shanda vazir kasallar sonining ortishiga dam oluvchilar profilaktika choralariga yaxshi rioya qilmayotganini sabab qilib ko‘rsatgan. Mamlakat iqtisodiyoti pandemiya sababli rekord darajada pasaygan.
So‘nggi ma’lumotlarga ko‘ra, Turkiyada pandemiya boshlanganidan buyon koronavirusga chalinganlar soni 400 ming kishidan oshgan, 11 mingdan ortiq bemor COVID-19 qurboniga aylangan.
Izoh (0)