Toshkent viloyati Bo‘stonliq tumani Chorvoq suv ombori bilan tutashgan tog‘ yonbag‘rida 31-iyul kuni yong‘in sodir bo‘ldi.
FVV matbuot xizmati bergan dastlabki ma’lumotga ko‘ra, soat 13:00 da “Burchmulla” o‘rmon xo‘jaligiga qarashli qir adirlikda quruq o‘t yonayotgani to‘g‘risida xabar kelib tushgan. Voqea joyiga Toshkent viloyati yong‘in-qutqaruv bo‘linmalari hamda O‘rmon xo‘jaligi xodimlari yetib borgan.
Toshkent viloyati hokimligi matbuot xizmati xabarida, yong‘in ta’sir hududi 3-5 gektar atrofida ekani taxmin qilingan. Yong‘in sodir bo‘lgan tog‘li hududga faqat piyoda, tog‘ so‘qmoqlari orqali borish mumkin. Shuning uchun hududga mudofaa vazirligining yong‘inni bartaraf etishga mo‘ljallangan aviatsiya kuchlari chaqirilgan. Viloyat favqulodda vaziyatlar boshqarmasi tomonidan barcha kuch va vositalar safarbar etildi.
FVV soat 16:41 da yong‘in qurshab olinganini soat 17:12 da o‘chirganini ma’lum qildi.
O‘rmon va yashil hududlarni ko‘paytirish va cho‘llanishga qarshi kurashish agentligi e’lon qilgan axborotga ko‘ra, yong‘in “Burchmulla” davlat o‘rmon xo‘jaligining Chotqol o‘rmon bo‘limida kelib chiqqan. Yong‘inni o‘chirishga Burchmulla davlat o‘rmon xo‘jaligining 60 nafar, Ugom-Chotqol milliy tabiat bog‘ining 10 nafar hamda Bo‘stonliq FVBning 30 nafar xodimlari jalb etildi. Shuningdek, Mudofaa vazirligining 2 dona vertolyoti yong‘inni bartaraf etishga ko‘maklashdi.
24-iyulda ham Bo‘stonliqda — Burchmulla davlat o‘rmon xo‘jaligida o‘rmon yong‘ini yuz bergandi. Tahminan 2 gektar maydonda quruq o‘t va shox-shabbalar yongan. Soat 11 larda boshlangan yong‘in soat 17:57 da to‘liq o‘chirilgan.
Izoh (0)