O‘zbekistonda oxirgi 5,5 yil davomida 155 ming nafarga yaqin mahkum muddatidan ilgari ozodlikka chiqarilgan. Bu haqdagi Oliy sud tahlillarida keltirilgan.
2025-yil yanvar-iyun oylarida O‘zbekistonda jinoyat ishlari bo‘yicha sudlar tomonidan 17 ming 144 nafar shaxs jazoni o‘tash muddatidan ilgari shartli ozod qilingan. Shu bilan birga, 5 ming 467 nafar shaxsning jazosi yengilrog‘i bilan almashtirilgan.
Taqqoslash uchun, 2023-yil mos davrida 15 ming 909 nafar, 2024-yil I yarmida 16 ming 624 nafar mahkum muddatidan oldin ozodlikka chiqarilgan. O‘tgan yilning yanvar-iyun oylarida 6 ming 222 nafar mahkum jazosi yengillashtirilgan.
Besh yil davomida muddatidan oldin shartli ozod qilinganlar soni quyidagicha bo‘lgan:
- 2020-yilda — 21 ming 970 nafar;
- 2021-yilda — 21 ming 780 nafar;
- 2022-yilda — 26 ming 753 nafar;
- 2023-yilda — 33 ming 612 nafar;
- 2024-yilda — 33 ming 151 nafar.
Avvalroq shu yilning I yarmida respublikada sudlar oqlagan shaxslar soni 2024-yil mos davridagidan 2,5 baravarga kamaygani xabar qilingandi.
Maʼlumot uchun, 2024-yilda mamlakat sudlarida jami 61 ming 481 ta jinoiy ish ko‘rib chiqilgani ochiqlangan. Yil davomida jinoyat ishlari bo‘yicha sudlarda oxirgi besh yillikdagi eng ko‘p — 77 ming 995 kishi sudlangan. Ular sodir etgan jinoyatlarning ijtimoiy xavflilik darajasi turlicha bo‘lgan. Xususan, 31 ming 212 shaxs (40 foiz) ijtimoiy xavfi katta bo‘lmagan, 19 ming 688 fuqaro (25 foiz) uncha og‘ir bo‘lmagan jinoyatlar sodir etgan. Qariyb 22 ming 951 kishi (29 foiz) og‘ir, 4 ming 144 kishi (5 foiz) o‘ta og‘ir jinoyatga qo‘l urgan.
O‘tgan yili respublikada 20 ming 655 shaxsga ozodlikdan mahrum qilish jazosi tayinlangan. Bu oxirgi besh yillikdagi rekord raqam hisoblanadi. Jumladan, 2020-yilda 7 ming 107 kishi, 2021-yilda 12 ming 922 kishi, 2022-yilda 17 ming 610 kishi, 2023-yil 17 ming 391 kishi ozodlikdan mahrum etilgan.
Izoh (0)