Joriy yil I yarmida mamlakatda sudlar oqlagan shaxslar soni 2024-yil mos davridagidan 2,5 baravarga kamaydi.
2025-yil yanvar-iyun oylarida O‘zbekistonda sudlar tomonidan 204 nafar shaxs oqlanib, reabilitatsiya qilingan. Bu haqda Oliy sud axborot xizmati xabar berdi.
Taqqoslash uchun, 2024-yil I yarmida 465 kishi oqlangan edi. Mazkur raqam joriy yilning dastlabki davridagiga qaraganda 2,5 baravar ko‘p. Statistik raqamlarga ko‘ra, 2023-yilning ilk olti oyida 564 nafar, 2022-yil mos davrida 468 nafar shaxs oqlangan.
O‘tgan 2024-yilda yilda sudlar tomonidan jami 723 nafar shaxs oqlangan. Bu oxirgi yetti yil ichidagi eng kam ko‘rsatkich hisoblanadi.
Sudlar faoliyati bo‘yicha statistikaga ko‘ra, 2017-2024-yillarda O‘zbekistonda jami 6 679 kishi oqlandi. Yillar kesimidagi ko‘rsatkichlar quyidagicha:
- 2017-yil 263 kishi;
- 2018-yil 867 kishi;
- 2019-yil 859 kishi;
- 2020-yil 781 kishi;
- 2021-yil 932 kishi;
- 2022-yil 1 010 kishi;
- 2023-yil 1 244 kishi.
Avvalroq 2024-yilda mamlakat sudlarida jami 61 481 ta jinoiy ish ko‘rib chiqilgani ochiqlangan. Yil davomida jinoyat ishlari bo‘yicha sudlarda oxirgi besh yillikdagi eng ko‘p — 77 995 kishi sudlangan. Ular sodir etgan jinoyatlarning ijtimoiy xavflilik darajasi turlicha bo‘lgan. Xususan, 31 212 shaxs (40 foiz) ijtimoiy xavfi katta bo‘lmagan, 19 688 fuqaro (25 foiz) uncha og‘ir bo‘lmagan jinoyatlar sodir etgan. Qariyb 22 951 kishi (29 foiz) og‘ir, 4 144 kishi (5 foiz) o‘ta og‘ir jinoyatga qo‘l urgan.
O‘tgan yili respublikada 20 655 shaxsga ozodlikdan mahrum qilish jazosi tayinlangan. Bu oxirgi besh yillikdagi rekord raqam hisoblanadi. Jumladan, 2020-yilda 7107 kishi, 2021-yilda 12 922 kishi, 2022-yilda 17 610 kishi, 2023-yil 17 391 kishi ozodlikdan mahrum etilgan.
Izoh (0)