Aziya Invest Favorit MCHJ — bu nom sizga judayam tanish to‘g‘rimi? Topdingiz, aynan shu MCHJ rahbari Toshkent shahri Yashnobod tumani Izzat ko‘chasida qurilishi rejalashtirilgan ko‘p qavatli uylardan kvartira sotib olish bo‘yicha shartnoma tuzgan mingdan ortiq fuqarolarni aldab, salkam 164 milliard so‘mga chuv tushirgandi. Holat yuzasidan o‘sha paytning o‘zida zudlik bilan Vazirlar Mahkamasining tegishli farmoyishi chiqarilib, Izzat turar joy majmuasidan uy sotib olmoqchi bo‘lib, aldanib qolgan fuqarolarning muammosini o‘rganish va ularni bartaraf etishga qaratilgan takliflar tayyorlash bo‘yicha Hukumat komissiyasi tuzilgandi. Ayni kunga kelib, aynan shu qurilish tashkilotidan jabr ko‘rganlarga Iyk ota massividan yangi xonadonlar qurib berildi.
“Daryo”ga Toshkent viloyatining Chirchiq shahridan murojaat qilganlarning aytishicha, ular ham aynan Aziya invest Favorit MCHJdan jabrlangan. 174 nafar kishi uy uchun pul to‘lab qo‘yib, 3 yildan beri uy qurilishi davom etishini kutmoqda.
2021-yil dekabr oyida uy-joy qurilishi bo‘yicha Toshkentda ko‘pchilikni aldab, jamoatchilikka yaxshi tanilgan quruvchi-tadbirkor Xayrulla Hatamovning yana bir tashkiloti “Halal Golden Meat” mas’uliyati cheklangan jamiyati bilan shartnoma imzolaganmiz. Oradan uch yil muddat o‘tgan bo‘lsa-da, uyimiz hamon kotlovan holatida turibdi. 2023-yilning iyul oyida Toshkent shahrining Yashnobod tumanidagi Izzat ko‘chasida uy olaman deb pul to‘lab aldanib qolgan odamlarning ko‘chaga chiqishiga Bosh vazirimiz tomonidan e’tibor qaratildi. Aldanib qolganlar uchun uylar qurilib, topshirildi ham. Lekin biz ham aynan Xayrulla Hatamov tomonidan aldandik. Shunga qaramasdan baribir e’tibordan chetda qolib ketdik, — deydi yangi xonadon uchun pul to‘lab, kuyib qolayotgan murojaatchi Sadoqat Ramanova.
Murojaatchining aytishicha, “Halal Golden Meat” mas’uliyati cheklangan jamiyati qurishni boshlagan binodagi sotuv ofisida bo‘lgan Javlon, Hojiakbar ismli xodimlarning mijozlar bilan bankka qo‘shilib borishi, imkon qadar pulni tezroq to‘latishga urinishi ularning gumonlanishiga sabab bo‘lgan.
Bosh vazirimiz boshchiligidagi komissiya tuzilib, Yashnoboddagi voqea nazoratga olingach, bizda ham ishonch paydo bo‘ldi. Demak e’tibor qaratishadi, Chirchiqdagilar muammosini ham hal qilishadi deb o‘yladik. Lekin hozirgacha hech qanday natija yo‘q. Eng yomoni biz qilgan murojaatlarga ham javob berishmayapti, — deydi murojaatchi.
“Ittifoq” mahallasida qad rostlayotgan ko‘p qavatli uydagi xonadonlarning biriga pul to‘lagan Husniddin Shodmonovning aytishicha, quruvchi ular pul to‘lagan uy 2023-yilning birinchi choragida foydalanishga topshirilishini aytgan.
2023-yil uy bitadi deyishgandi. Mana 2024-yilning sentyabr oyi kelyaptiki, lekin uyimiz haliyam kotlovan holatida turibdi. Xayrulla Hatamov kabi tadbirkorlar prezidentmiz siyosatiga qarshi chiqyapti-ku. Nega tadbirkorlarga yaratilayotgan imkoniyatni suiste’mol qilishyapti?, — deydi Husniddin Shodmonov.
Suhbatdoshning aytishicha, mazkur uydagi xonadonlar uchun to‘lov qilganlar orasida uyini sotib to‘lov qilgani uchun ijarada yashayotganlar, ko‘ch-ko‘ronini tanishlarining uyiga qo‘yib, xonadoni qurilishi bitishini ko‘zi to‘rt bo‘lib kutayotganlar bor.
Murojaatimiz yuqoridagi rahbarlarga yetib borishini, odamlarni aldayotgan tadbirkorlarni tartibga chaqirishsa degan umidimiz bor. Zora 2024-yil yakuni bilan uyimiz qurilishi bitsa va odamlarning ko‘ngli xotirjam bo‘lsa, — deydi u.
Yana bir aldangan fuqaro Mashhura Jalilovaning aytishicha, ushbu yangi xonadonlar qurilayotgani haqidagi xabarni u hokimiyat binosida reklama qilishganida ko‘rib, ishongan.
2021-yilning oktyabr oyida 3 xonali xonadonga to‘lov qilgandik. O‘sha paytda aksiya ketyapti, hatto boshlang‘ich to‘lovni ham bo‘lib-bo‘lib to‘lashingiz mumkin deyishganiga, ularga ishonib, to‘lov qilgandik. Bugungi kunga kelib, ancha pulga kuyib o‘tiribmiz. Aldandik. Murojaat qilmagan joyimiz qolmadi. Hech kim bizni eshitmayapti, yordam bermayapti, — deydi jabrlanuvchi Mashhura Jalilova.
Dilafro‘z Kamolova ismli yana bir jabrlanuvchining aytishicha, aynan shu 9 qavatli uydan xonadon olish uchun to‘lov qilganlar 174 kishini tashkil etadi.
«Ayol boshipm bilan uch nafar farzandimni tashlab, Rossiyaga borib ishlab, yig‘gan pulimni uyga to‘lagandim. Yetmaganiga banklardan biridan kredit olib, qo‘shib to‘ladim. Biz hali qurilishi boshlansada davom etmayotgan uyimga kredit to‘lab kelyapman. Bu haqda hokimiyatga, hatto Bosh prokuraturaga murojaat qildik. Lekin natija yo‘q», — deydi jabrlanuvchi.
Yangi xonadon uchun 60 million so‘m to‘lagan Mahfuza Muzropovaning bildirishicha, u aldanganini sezgach, pulini qaytarib olishga harakat qilgan. Ammo quruvchi tomon na pulni qaytargan na qurilishni davom ettirgan.
Yana bir suhbatdosh Olmosxon Nishonboyeva esa yangi xonadon uchun 55 million so‘m to‘laganini, ayni kunga kelib, pulga kuyib qolayotganini, hech qaysi tashkilo ularning muammosiga e’tibor qaratmayotganini bildirmoqda.
To‘rt nafar bolam bor. Oyiga 200 dollar to‘lab, ijarada yashab kelamiz. Judayam qiynalib ketdik. Nogiron farzand boqish mushkul ish. Eng yomoni mana bunday aldanib qolyapmiz. Bizga hech kim yordam bermayapti, — deydi jabrlanuvchi ayollardan yana biri.
Bir xonali uyini sotib, ikki xonali xonadonga to‘lov qilgan fuqaroning aytishicha, quruvchi fuqarolarga tayyor xonadonlarga yotoqxona mebellarini ham qo‘shib topshiramiz deya aldagan.
O‘sha paytda bu uydan oldin bitadigan uylarni ham ko‘rgandik. Mahallada bunaqa yangi uylar ko‘p qurilayotgandi. Lekin aynan shu quruvchining odamlariga aldandik. Ular yangi xonadonlarga o‘zimizning hisobimizdan yotoqxona mebel ham qo‘shib beramiz deb, bizni aldashdi. Ishonib, pulimizni topshirib o‘tiribmiz-da. Mana bugungi kunga kelib, aldanib qoldik, — deydi u.
Murojaatchilarning aytishicha, shu ko‘p qavatli uylardagi xonadonga to‘lov qilib, aldanib qolgan o‘qituvchi ayol ayni kunda judayam sarson bo‘lmoqda.
O‘zi o‘qituvchi, eri Rossiyada ishlab keladi. Bor pulini uyga to‘lov qilib, bugungi kunda yuklarini hamkasblarining uyiga bo‘lib-bo‘lib saqlab kelyapti. Tasavvur qilyapsizmi uyidagi anjomlarini birovlarning uyiga bo‘lib-bo‘lib qo‘yib, o‘zi sarson-sargardonlikda yashab kelmoqda. Vijdonsiz quruvchilar buni his qilmaydi. Biz muttahamlik, o‘g‘rilik qilib, o‘sha pulni topganimizda achinmasdik. Peshona terimiz bilan topilgan pullarimizga achinyapmiz, — deydi jabrlanuvchilar.
Bosh pudratchi “Halal Golden Meat” ekani aytilayotgan qurilish pasportida keltirilishicha, “Yangi O‘zbekiston” massivida 2 ta 7 qavatli, 1 ta 9 qavatli, 4 ta 12 qavatli va 3 ta 16 qavatli uylar qurilib, jami 492 nafar fuqaro yangi xonadonli bo‘lishi rejalashtirilgan. Shulardan faqatgina 2 ta 7 qavatli uy foydalanishga topshirilgan.
“Daryo” mavzuga qaytadi.
Izoh (0)