Ozarbayjonning Xankendi shahrida o‘tkazilgan yirik media-forumda Ilhom Aliyev Tog‘li Qorabog‘ni tiklashda ilk sovg‘ani O‘zbekiston berganini aytdi. Bu haqda Ozarbayjon prezidenti matbuot xizmati xabar berdi.
“O‘zbekistonlik birodarlarimizning ko‘magi biz uchun hamisha qadrli bo‘lgan. Bilasizki, Qorabog‘ning tiklanishiga birinchi sovg‘a O‘zbekiston tomonidan berilgan. Muhtaram prezident Shavkat Miromonovich tashabbusi bilan Fuzuliy shahrida o‘zbek xalqining buyuk farzandi Mirzo Ulug‘bek nomini olgan 960 o‘rinli maktab barpo etildi. Fuzuliy shahrida ushbu maktabni Shavkat Miromonovich bilan birgalikda ochdik”, degan Ozarbayjon rahbari tadbirda ishtirok etgan O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘janing bir necha savollariga bergan javobida.
Ilhom Aliyev forumdan ikki kun avval ushbu maktabda bo‘lganini, unda 500 nafardan ortiq bola o‘qiyotganini qayd etdi.
“Sobiq qochqinlarni Fuzuliyga qaytarish jarayoni hali boshlang‘ich bosqichda ekaniga qaramay, u yerda shuncha bolalar tahsil olmoqda. Biz buni juda qadrlaymiz, bu O‘zbekiston prezidentining samimiy birodarlik ishorasi, Ozarbayjonga hududni tiklashda ko‘rsatgan yordami bo‘ldi”, degan Ilhom Aliyev.
O‘tgan qariyb 30 yilda Fuzuliy butkul vayron bo‘lib, “arvoh shahar”ga aylangan edi. Harbiy harakatlarga qadar bu yerda 18 ming nafarga yaqin aholi istiqomat qilgan. 2020-yilda qayta tiklash ishlari boshlangach, shaharga asta-sekin hayot qaytmoqda.
Shavkat Mirziyoyev 2021-yilning aprelida Turkiy tilli davlatlar hamkorlik kengashining videokonferensiya shaklida o‘tkazilgan norasmiy sammitida O‘zbekiston Tog‘li Qorabog‘ zaminidagi ko‘hna obidalar, madaniyat va ma’rifat maskanlarini tiklash ishlariga hissa qo‘shishga tayyor ekanini bildirgandi. O‘zbekiston tuhfa sifatida Tog‘li Qorabog‘da maktab qurishi aytilgandi.
2023-yilning avgustida Shavkat Mirziyoyevning Ozarbayjonga tashrifining ikkinchi kunida ikki davlat rahbarlari rafiqalari bilan birga Fuzuliy shahriga tashrif buyurib, O‘zbekistondan tuhfa sifatida qurilgan maktab ochilishida ishtirok etgandi.
Mirzo Ulug‘bek nomidagi 1-sonli maktabda 40 ta sinfxona, 6 ta laboratoriya, 2 ta informatika xonasi, 5 ta funksional o‘quv xonasi, majlislar va sport zallari, oshxona, kutubxona mavjud. Futbol maydoni, dam olish va tadbirlar o‘tkazish uchun joylar, yugurish yo‘laklari tashkil qilingan.
Izoh (0)