Livan markaziy banki barcha litsenziyalangan moliya institutlariga “Hizbulloh”ga aloqador moliyaviy muassasa – Al-Qard Al-Hassan bilan ishlashni taqiqladi. Bu haqda Al Arabiya xabar berdi.
Bankning bu qarori “Hizbulloh”ning davlat ishlariga ta’siri pasayganidan dalolat bermoqda. Guruh Isroil bilan urushdan keyin kuchayib borayotgan bosimga, jumladan, moliyaviy bosimga duch kelgan.
Reuters nashrining ta’kidlashicha, 14-iyul kuni e’lon qilingan bayonotda Livan markaziy banki mamlakatdagi barcha litsenziyalangan moliya institutlariga litsenziyasiz tashkilotlar bilan to‘g‘ridan-to‘g‘ri yoki bilvosita aloqada bo‘lishni taqiqlagan. Ular qatorida “Hizbulloh”ning Al-Qard Al-Hassan tashkiloti ham bor.
AQSHning yuqori martabali diplomati bank qaroriga “to‘g‘ri yo‘nalishdagi qadam” deb baho bergan.
“Markaziy bank nazorati ostida Livandagi barcha moliyaviy tashkilotlarning shaffofligi va muvofiqlashuvi muhim yutuqdir”, dedi AQSHning Suriya bo‘yicha maxsus vakili Tom Barrak.
AQSH Moliya vazirligi 2007-yilda Al-Qard Al-Hassanga qarshi sanksiya kiritgan. O‘sha paytda, “Hizbulloh” undan moliyaviy faoliyatni boshqarish va xalqaro moliya tizimiga kirish uchun niqob sifatida foydalangani da’vo qilingandi.
Qudratli qurol-yarog‘lari bilan mashhur “Hizbulloh” uzoq vaqtdan beri Livan davlat ishlariga hal qiluvchi ta’sir ko‘rsatib kelgan. Ammo u fevral oyida Isroil bilan urushdan keyingi hukumatni shakllantirishda o‘z ta’sirini o‘tkaza olmay qolgan.
Al-Qard al-Hassan 1983-yilda tashkil etilgan. Tashkilot o‘zini foizlarni taqiqlovchi islomiy qarz beruvchi xayriya tashkiloti sifatida ko‘radi. Isroil 2024-yili “Hizbulloh” bilan urush paytida tashkilotning ba’zi filiallariga zarba bergan.
Ushbu moliyaviy muassasa Livan hukumati tomonidan berilgan litsenziya bo‘yicha notijorat tashkilot sifatida faoliyat yuritadi. Uning 30 dan ortiq filiallari bo‘lib, ular Bayrut, janubiy Livan va Bekaa vodiysining asosan shia musulmon hududlarida joylashgan.
Izoh (0)