“Qo‘shni davlatlar bilan aloqalarni mustahkamlash lozim” — Eron prezidenti

Eron prezidenti Mas'ud Pezeshkiyon tashqi siyosatda qo‘shni davlatlar bilan aloqalarni mustahkamlash lozimligini ta’kidladi. Bu haqda Anadolu xabar berdi.

Mustahkam aloqalarni yo‘lga qo‘yish masalasi haqida prezident Tashqi ishlar vazirligi xodimlari bilan uchrashuvda ma’lum qilgan. Unga ko‘ra, Isroil va AQSH tomonidan mamlakatga qilingan hujumlarga qaramay, Eron diplomatiyasi o‘z kuchini yo‘qotmagan.

“Ayrim elchixonalarimiz vaqtincha yopilganiga qaramay, diplomatlarimiz o‘z vazifasini davom ettirdi. Ular xalqimizning ovozini dunyoga yetkazib, xalqaro aloqalarni saqlab turdi”, dedi Pezeshkiyon.

Prezidentning ta’kidlashicha, Oliy rahnamo Oyatulloh Ali Xomanaiy tavsiyalariga binoan, hozirgi sharoitda himoya, xavfsizlik va diplomatiya yo‘nalishlarini faol davom ettirish lozim.

“Diplomatik sohadagi hamkasblarimiz bu yo‘lda katta mehnat qilmoqda. Biz esa davlatimiz siyosati doirasida tashqi aloqalarni rivojlantirish, ayniqsa qo‘shni davlatlar bilan yaqin, chuqur va barqaror munosabatlar o‘rnatishga e’tibor qaratishimiz talab etiladi”, dedi Pezeshkiyon.

U BRICS va Shanxay hamkorlik tashkiloti a’zolari bilan ham hamkorlikni kengaytirish zarurligini ta’kidlab, bu borada Rossiya, Xitoy va boshqa hamkor davlatlar bilan munosabatlar davom etishini qo‘shimcha qildi.

“Biz, ayniqsa, Turkiya, Turkmaniston, Ozarbayjon, Afg‘oniston, Pokiston, Iroq va Fors ko‘rfazi mamlakatlari bilan aloqalarni mustahkamlashimiz juda muhim. Agar ular bilan munosabatlarni kuchaytirsak, katta yutuqlarga erishishimiz mumkin. Bunda faqat diplomatlar emas, balki ishbilarmonlar, madaniyat arboblari, olimlar, hattoki sayyohlar ham faol bo‘lishi kerak”, degan Eron prezidenti.