“Kalmar o‘yini”dagi ishtirokchilar nega aynan yashil, qo‘riqchilar esa qizil kiyimda tasvirlangan?

“Kalmar o‘yini” serialida vizual obrazlarning ahamiyati katta. Hatto kiyim ranglari ham syujetda muhim rol o‘ynaydi va ular bejiz tanlanmagan. Ranglar nafaqat o‘yin ishtirokchisining qaysi toifaga mansubligini ko‘rsatadi, balki chuqur ma’noni bildiradi.

Serialda o‘yinchilar yashil sport kiyimida, qo‘riqchilar esa qizil niqobli formada tasvirlangan. Halok bo‘lgan ishtirokchilar esa qora tobutlarga joylanib, usti pushti tasma bilan bog‘langan. Ular nimani anglatadi?

Yashil rang: itoat, umid va 80-yillar sport kiyimi

O‘yin ishtirokchilarining kiyimi yashil rangda. Janubiy Koreyada bu rang odatda umid tuyg‘usini ifodalaydi, ammo bu serial kontekstida kinoyaga aylanadi. Chunki o‘yindan odamlar omon qolishi amrimahol.

Yashil forma maktab yoki internatdagi tarbiyalanuvchilar kiyimini eslatadi. Bu orqali qahramonlar bolalik holatiga qaytariladi: ular qarzlari ko‘p bo‘lgani sababli umidsizlik domiga tushgan va “kattalar”ga qaram bo‘lib qolgandek go‘yo.

Qizil: nazorat, hokimiyat va xatar belgisi

Qo‘riqchilar yorqin qizil — to‘q pushti libos kiyishgan. Koreys madaniyatida bu rang kuch, hayot va ayni paytda biroz agressiyani bildiradi. Serialda esa bu rang ogohlantiruvchi signal bo‘lib xizmat qiladi: “xavf”, “yaqinlashmang”, “ogoh bo‘ling”.

Qo‘riqchilarning na yuzi, na ismi bor, ularni faqat niqobdagi belgilari ajratib turadi. Ular xuddi kompyuter o‘yinidagi dushman kabi insoniylikdan xoli shaxslardir.

Qora tobutlar va pushti bog‘ich: “xudo”ning sovg‘asi

Serialdagi eng vahimali tasvirlardan biri o‘yin ishtirokchilari uchun tayyorlangan tobutlardir. Ular qora rangda bo‘lib, ustiga yorqin pushti tasma bog‘langan. Serialda tobutlar xuddi bayramona sovg‘a qutisiga o‘xshash tarzda tuzilgan. “Kalmar o‘yini” badiiy rahbar Che Kyon Sonning so‘zlariga ko‘ra, bu dizayn o‘yin yaratuvchisining qanday fikrlashini aks ettiradi.

“O‘yin boshqaruvchilari o‘zlarini xudodek tasavvur qiladi va ishtirokchilarga imkoniyat ato etayotgan ilohiy kuch sifatida biladi”, deydi Che Kyon Son.

Serialda hatto o‘lim ham shou elementiga aylantirilgan. Bu xuddi VIP mijozlar uchun ko‘rsatilayotgan xizmatdek ko‘rsatilgan.

Nega aynan pushti bog‘ich?

Serial rejissyori Hvan Don Xyok buni quyidagicha izohladi:

“Serialda asosiy ranglar qora va pushti. Men esa bog‘ichni tanlashda Blackpink guruhining obrazidan ilhomlandim”, dedi u.