Tailand poytaxti Bangkok shahrining mashhur Or Tor Kor oziq-ovqat bozorida 28-iyul kuni qurolli hujum sodir bo‘ldi. Hujum uyushtirgan shaxs oldin 5 kishiga o‘q uzib, keyin o‘z joniga qasd qildi. Bu haqda BBC xabar berdi.
Halok bo‘lganlarning 4 nafari — xavfsizlik xodimlari, beshinchisi esa bozor ishchisi edi. Politsiya yana 2 nafar savdogar ham yaralanganini ma’lum qilgan.
Politsiya kapitan Siom Bunsomning aytishicha, hujumni amalga oshirgan shaxs — Tailand fuqarosi bo‘lgan. U avvaldan bozor qo‘riqchilari bilan shaxsiy nizoda bo‘lgan. Rasmiylar ushbu otishma Tailandning Kambodja bilan bo‘layotgan chegara nizolari bilan bog‘liq emasligini aytmoqda. Or Tor Kor bozori yangi meva-sabzavot va dengiz mahsulotlari bilan mashhur bo‘lib, Bangkokdagi eng nufuzli bozorlardan biri hisoblanadi.
Tailandda qurolga egalik qilish darajasi mintaqa bo‘yicha nisbatan yuqori bo‘lsa-da, ommaviy otishmalar kam uchraydi. Ammo halokatli hodisalar ham yo‘q emas, jumladan:
- 2023-yilda Bangkok markazidagi savdo markazida 14 yoshli bola 2 nafar odamni otib o‘ldirib, 5 kishini yaralagan;
- 2022-yilda Tailand shimoli-sharqidagi bolalar bog‘chasida sobiq politsiyachi tomonidan uyushtirilgan qurolli hujumda 37 kishi, asosan bolalar, halok bo‘lgan;
- 2020-yilda Naxon Ratchasima shahrida bir askar 29 kishini o‘ldirib, yana o‘nlab kishilarni jarohatlagandi.
Izoh (0)