AQSH prezidenti Donald Tramp milliarder Ilon Maskning yangi “Amerika” partiyasini “ahmoqona” deya baholadi. Bu haqda BBC xabar berdi.
Tramp mamlakatda uchinchi partiyaga asos solish “chalkashlik”ni yanada kuchaytirishini ta’kidladi.
“Uchinchi partiyaga asos solish ahmoqona fikr, deb o‘ylayman. Doimo ikki partiyaviy tizim amal qilgan. Menimcha, uchinchi partiyani tuzish chalkashlikni yanada kuchaytiradi”, dedi Tramp.
Bir necha haftalik muhokamadan so‘ng, Mask 6-iyul kuni X tarmog‘ida respublikachilar va demokratlarning “Yagona partiyasi”ga qarshi chiqish uchun yangi partiya tuzganini e’lon qilgandi.
Yangi partiya tuzish so‘rovnomasi AQSH prezidenti Donald Tramp tomonidan “katta va ajoyib” deb ta’riflangan soliq to‘g‘risidagi qonun imzolangani sabab bo‘ldi.
Dastlab qonun loyihasi Mask tomonidan qattiq tanqidga uchradi va bu holat uning Tramp bilan janjaliga sabab bo‘ldi. Qonunga ko‘ra, AQSH mudofaasi va chegaralarini qo‘riqlash xarajatlari oshib, ba’zi ijtimoiy dasturlarni moliyalashtirish qisqaradi. Mask esa bu biznesiga taʼsir qilishidan xavotirda.
Milliarder qaror qabul qilinsa, “Amerika” partiyasini tuzish bilan tahdid qilgandi. AQSH prezidenti esa milliarderning biznesini subsidiyalardan mahrum qilishini aytgan. Natijada Mask “vatani Janubiy Afrikaga qaytish”ga majbur bo‘lishini aytgandi.
Mask va Tramp iyun oyi boshida yuqoridagi qonun loyihasi ustida ziddiyatga borgan edi. Milliarder bu tashabbusni “jirkanch” deb atagan hamda iqtisodiyot uchun salbiy oqibatlarga olib kelishini aytgan. AQSH prezidenti esa Ilon Mask qonun loyihasidan juda yaxshi xabardorligi, tadbirkor elektromobillar uchun imtiyozlar bekor qilinayotgani sabab norozi bo‘layotganini ta’kidlagan.
Bunga javoban Mask AQSH prezidentini yolg‘onchilikda ayblagandi. Keyinchalik milliarder prezident haqidagi bir nechta postlari uchun uzr so‘rab, “haddan oshib ketganini” tan olgan. Amerika yetakchisi, o‘z navbatida, Maskning uzrlarini “juda samimiy” deb atagandi.
Izoh (0)