Angliyada plastik jarroh hamkasbi uyiga o‘t qo‘yib, uni pichoqlab o‘ldirmoqchi bo‘lgani uchun 22 yil qamoq jazosiga hukm qilindi. Bu haqda Euronews xabar berdi.
61 yoshli Jonatan Piter Bruks 2021-yil 14-yanvar kuni erta tongda Nottingemshirdagi Grem Perksning uyiga kamuflyaj kiyimida, lom, benzin idishlari, gugurt va pichoq olib kirgan.
Bruks uyning birinchi qavatiga benzin to‘kib chiqadi, ammo uni yoqishga ulgurmay, 65 yoshli Perks uni to‘xtatgan. Jarroh yaqinda nafaqaga chiqqan hamkasbining qorin qismiga pichoq urib, hayot uchun xavfli jarohat yetkazgan.
Bruks ish joyida intizomiy muammolarga duch kelgan. U jarayonga aralashgani uchun Perksga nisbatan g‘azabi borligi ta’kidlangan.
U aprel oyida 2 marta qotillikka urinish, 1 marta hayotini xavf ostiga qo‘yish maqsadida o‘t qo‘yishga urinish va 1 marta tig‘li buyumga egalik qilishda ayblangan. 9-iyun kuni Bruksga kamida 22 yillik qamoq muddat berilgan.
“Bruks hamkasbini o‘ldirishga urinib, o‘ta zo‘ravonlik harakatini sodir etdi. Bu rejalashtirilgan, hisob-kitob qilingan hujum bo‘lib, unda Bruks o‘zining sobiq hamkasbini o‘ldirishga qat’iy qaror qilganini ko‘rsatdi”, dedi “Crown” prokuraturasi bosh prokurori o‘rinbosari Samanta Shallow.
Bruks kamerani tark etishdan bosh tortgani uchun videoaloqa orqali unga jazo tayinlangan. Prokurorlarning ta’kidlashicha, uning sud jarayoni “o‘ta g‘ayrioddiy”, chunki u barcha jarayonlarda ishtirok etmagan. Bruksning hukmi 4 yillik sud majlislari, jumladan, noto‘g‘ri sud jarayoni va boshqa bir nechta bekor qilingan sud sanalaridan keyin e’lon qilingan.
Izoh (0)