O‘zbekistonda davlatga qarashli 20 ta oliy taʼlim muassasalari yopilishi rejalashtirilmoqda. Bu haqda Oliy taʼlim, fan va innovatsiyalar vaziri Qo‘ng‘irotboy Sharipov YouTube’dagi “Lolazor” podkastida maʼlum qildi.
Vazir so‘zlariga ko‘ra, respublikada o‘qitish standartlariga javob bermaydigan qator davlat OTMlari mavjud. Ayni paytda ularni ro‘yxatga olish va yopish reja qilinmoqda.
“Prezident talabga javob bermaydigan, davlatga tegishli 20 ta universitetni yoping, deb topshiriq berdi. Ularning ro‘yxati yaqinda shakllanadi. Qaysi universitetlarning bitiruvchilarini ish bilan taʼminlash ko‘rsatkichi past bo‘lsa, yopiladi. Bu ko‘proq viloyatlardagi filiallar bilan bog‘liq jarayon. Uzoq tumanlarda universitetlar ochilgan. Ularda kadr yo‘q, salohiyat juda past. U yerlarga professor-o‘qituvchilar bormaydi. Talabalarning ko‘pchiligi o‘sha universitetlarga o‘qishini boshqa OTMga ‘perevod’ qilish uchun kiradi. Chunki filiallarda o‘qishga kirish bali past. Xayolida u yerda o‘qish emas, bu yoqqa ko‘chib kelish”, dedi vazirlik rahbari.
Qo‘ng‘irotboy Sharipovning aytishicha, yuqorida aytilayotgan OTMlar bitiruvchilarining 5–10 foizi ish bilan taʼminlanmoqda.
“Chunki u universitetlarni bitirganlarga talab yo‘q. Shuncha binoga, o‘qituvchiga xarajat qilinmoqda. Ayniqsa, texnika sohasida kadr tayyorlaydigan bo‘lsak, talabalar 6–7 million so‘m kontrakt puli to‘laydi. Lekin har birining xarajatlari davlatga 20 million so‘mga tushadi. Hozir O‘zbekistonda 67 ta xususiy, 111 ta davlat OTMlari bor. Ayrim oliygohlar yopilishi sabab davlat va xususiy OTMlar soni teng bo‘ladi”, deya qo‘shimcha qildi vazir.
Avvalroq Qo‘ng‘irotboy Sharipov yoshlar orasida sifatli taʼlim olish uchun emas, diplom uchun o‘qishga kirish holatlari haligacha ko‘pligini aytgandi.
Izoh (0)