Pokistonda 2-iyun kuni yer silkinishi ortidan 200 dan ortiq mahbus qamoqxonadan qochib ketdi. Bu haqda Reuters xabar berdi.
Mahbuslar Malir qamoqxonasida jazo o‘tayotgan bo‘lgan. Ularga zilzila sababli kameralarini tark etishga ruxsat berilgan. Biroq tartibsizliklardan foydalanib, ayrim mahbuslar qochib ketgan.
Bu vaqtda 600 dan ortiq odam kameradan tashqarida bo‘lgan. Tartibsizlik tufayli ulardan 216 nafari asosiy darvozadan qochishga muvaffaq bo‘ldi, deydi qamoqxona boshlig‘i Arshad Shoh.
U qochganlarning 80 ga yaqini allaqachon qo‘lga olingani, qolganlarini qidirish davom etayotganini aytgan. Sind viloyati ichki ishlar rahbari Ziyo ul-Hasan Lanjar bu mamlakatdagi qamoqxonalardan so‘nggi yillardagi eng yirik qochish ekanini ta’kidlagan. Barcha qochqinlarning shaxsi aniqlangan. Hozirda ularning qarindoshlari yashaydigan joylar va ularga tutash hududlarda reydlar o‘tkazilmoqda.
Viloyat politsiyasi boshlig‘i G‘ulom Nabi Memonning aytishicha, mahbuslarning aksariyati giyohvandlik kabi kichik jinoyatlarda ayblangan.
Mayda jinoyatlar bo‘yicha ayblovlar terrorizm kabi katta ishga aylanadi, deydi Arshad Shoh.
Geo News xabariga ko‘ra, hodisa chog‘ida chegara korpusining uch xodimi va bir qamoqxona xodimi yaralangan, bir mahbus halok bo‘lgan. Muassasa ma’muriyati voqea sodir bo‘lgan vaqtda qamoqxonada 6 022 nafar mahbus bo‘lganini aytmoqda.
Izoh (0)