Shavkat Mirziyoyev va Sadir Japarov rafiqalari hamrohligida Xivaga bordi (foto)

O‘zbekiston prezidenti Shavkat Mirziyoyev va Qirg‘iziston prezidenti Sadir Japarov ikki mamlakat birinchi xonimlari bilan birgalikda Xiva shahridagi Ichanqal’a majmuasi va Nurillaboy saroy majmuasiga tashrif buyurdi.

Prezident matbuot xizmatining ma’lum qilishicha, oliy martabali mehmonlar tanishuvni Ota darvozadan boshlab, noyob Ko‘hna ark majmuasi, Sherg‘ozixon madrasasi, Juma masjidi, Toshhovli majmuasi va boshqa obidalar bilan tanishdi.

Mehmonlar sharafiga o‘zbek xalq qo‘shiqlari yangrab, teatrlashtirilgan tomosha namoyish etildi.

Shundan so‘ng Nurillaboy saroyiga tashrif buyurildi. Saroy-bog‘ majmuasi XX asr boshlarida bunyod etilgan. Majmua madrasa, 100 dan ortiq xonalar, galereyalardan iborat. Saroy xonalarini bezashda xivalik mohir ustalar bilan birga chet ellik rassom-dekoratorlar ham ishtirok etgan, ular saroyning sharqona qiyofasiga Yevropaning modern uslubini singdirgan.

Xabarda aytilishicha, Xiva tarixi va uning fan rivojiga qo‘shgan hissasi, shuningdek, hududning boy madaniyati va san’ati haqidagi hikoyalar qirg‘izistonlik mehmonlarda katta taassurot qoldirdi.

Xiva shahri 1990-yilda YUNЕSKOning Jahon merosi ro‘yxatiga kiritilgan, 1997-yilda uning 2500 yilligi nishonlangan. Shahar 2020-yilda Turkiy dunyoning madaniy poytaxti, 2024-yilda esa Islom dunyosining turizm poytaxti bo‘ldi. Ochiq osmon ostidagi muzey sifatida tanilgan Xiva yaxlit yodgorlik sifatida Markaziy Osiyoda saqlanib qolgan yagona shahar hisoblanadi. Bu yerda 120 dan ortiq me’moriy obidalar joylashgan.

Qirg‘iziston prezidenti Sadir Japarov rafiqasi hamrohligida 18-iyul kuni davlat tashrifi bilan O‘zbekistonga kelgandi. Ko‘ksaroyda u tantanali kutib olindi. O‘zbekiston va Qirg‘iziston prezidentlari tor va kengaytirilgan tarkibda muzokara o‘tkazib, bir qator yirik qo‘shma loyihalarga start berdi. Muzokaralar yakunida ikki tomonlama hujjatlar imzolandi hamda OAV vakillari uchun bayonot berildi. Prezidentlar rafiqalari bilan birga O‘zbekiston va Qirg‘iziston san’at ustalarining konsertini tomosha qildi.